Տարին նախորդի համեմատ կլինի ավելի ջրառատ

Այս տարին, նախորդ տարվա հետ համեմատած, կլինի ավելի ջրառատ: Այս մասին փետրվարի 11-ին լրագրողներին տեղեկացրեց ՏԿԱԻՆ Հիդրոմետծառայության հիդրոլոգիայի կենտրոնի պետ Լևոն Ազիզյանը՝ ի պատասխան վերջերս ԶԼՄ-ներում շրջանառվող այն տեղետակվության, ըստ որի տարին կրկին լինելու է սակավաջուր:

«Պաշտոնապես հայտարարում եմ, որ այդ տեղեկատվությունը հիմնված չէ փաստերի վրա և չի համապատասխանում իրականությանը: Գարնանային վարարումների հոսքի մեծությունը, ջրամբարների լցվածությունը և առավելագույն ելքի մեծությունը կախված են նախաձմեռային շրջանի հիդրոօդերևութաբանական պայմաններից, ձմռան ընթացքում կուտակված պաշարից և գարնանն օդի ջերմության պայմաններից: Նախաձմեռային հիդրոօդերևութաբանական պայմաններն այս աշնանն եղել են բարենպաստ, տեղումները կազմել են նորմայի 150%, ինչը նպաստավոր պայման է ջրային ռեսուրսների ձևավորման համար»,- ասաց Լևոն Ազիզյանը:

Ինչ վերաբերում է ձնածածկույթին, ապա Հիդրոմետծառայության հիդրոլոգիայի կենտրոնի պետը նշեց, որ փետրվարի առաջին տասնօրյակի դրությամբ հանրապետության խոշոր ջրավազանային տարածքներում ձնածածկույթը կազմում է նորմայի 80-90%-ը, սակայն Սևանի և Արփի լճերի տարածքում այն կազմել է 60-70%, իսկ Ախուրյանի ավազանում այն կազմել է 100-120%:

«Վարարների հոսքը կախված է նաև վարարումների ընթացքում եղանակային պայմաններից: Եղել են տարիներ, երբ հանրապետությունում կուտակվել է մեծ քանակությամբ ձյուն, սակայն վարարումների ժամանակահատվածում տաք եղանակային պայմանների պատճառով հոսք չի ձևավորվել, և վարարումներ տեղի չեն ունեցել: Նմանը տեղի ունեցավ 2013 թ., երբ առատ ձյան պայմաններում աշնանը խոնավությունը ցածր էր, իսկ մարտին ջերմային աստիճանը բարձր էր: Սակայն եղել են տարիներ, երբ հանրապետությունում կուտակվել է քիչ քանակությամբ ձյուն, որից հետո գարնանային և ամառային ամիսներին տեղումների մեծ քանակի շնորհիվ հնարավոր է եղել ապահովել ջրամբարների լցվածությունը»,- նկատեց Լևոն Ազիզյանը:

Փետրվարի 11 դրությամբ Ապարանի ջրամբարում ջրի ծավալը կազմում է 12,3 միլիոն խմ, Ազատի ջրամբարում՝ 22,9 միլիոն, Ախուրյանի ջրամբարում' 140 միլիոն: Հիդրոմետծառայության հիդրոլոգիայի կենտրոնի պետի գնահատմամբ՝ ջրի այսպիսի ծավալները հավասար են անցած տարվա ցուցանիշներին, սակայն այս տարի աշնանային խոնավությունը բավականին բարձր էր, ուստի ձյան հալքի կորուստները բավականին քիչ են լինելու, և ձնածածկույթը 30 սմ-ով ավելի բարձր է նախորդ տարվա ցուցանիշից: