Ադրբեջանի գոյությունը հարցականի տակ է. «Ենի Մուսավաթ»

Ադրբեջանում հնարավոր էթնիկ դիմակայություն ստեղծվելու իրավիճակի վերլուծությունը ցույց է տալիս, որ Ադրբեջանի հյուսիսարևելյան լեզգիաբնակ հատվածում աստիճանաբար աճում է Ռուսաստանի, իսկ հարավարևելյան թալիշաբնակ հատվածում' Իրանի ազդեցությունը, ինչով այդ տարածքների վերահսկողությունը Ռուսաստանի և Իրանի ձեռքն անցնելու հնարավորությունը խիստ մեծանում է:

Այս մասին, ինչպես հաղորդում է «Արմենպրես»-ը, հայտնում է ադրբեջանական «Ենի Մուսավաթ» թերթը' նշելով, որ այդպիսով Ադրբեջանի գոյությունն աստիճանաբար հայտնվում է հարցականի տակ:

Թերթը Ադրբեջանի իշխանությանը խորհուրդ է տալիս այդ գործընթացը կանխելուն ուղղված շտապ միջոցների ծրագրեր մշակել:

Թերթը նշում է, որ դեռևս 1993 թվականին օրակարգում հայտնվել էր Ադրբեջանի հարավում Թալիշ-Մուղանական Հանրապետության, հյուսիսում անկախ Լեզգիստանի ստեղծման խնդիրը, և ներկայում խաղարկվող «թալիշական խաղաքարտը» խոսում է հենց այդ սցենարը կրկնվելու հնարավորության մասին:

Միաժամանակ թերթը հայտնում է, որ Ադրբեջանի հյուսիսում և հարավում հաճախակիացել են այն դեպքերի թիվը, երբ մեծ թվով քաղաքացիներ հրաժարվում են ենթարկվել ադրբեջանական օրենքներին, մարտահրավեր են նետում պաշտոնական Բաքվին և անհարգալից վերաբերմունք են ցույց տալիս պետական լեզվի նկատմամբ:

«Հյուսիսային շրջանների բնակչության մեծ մասն աշխատանք գտնելու համար մեկնում է Ռուսաստան: Այդ շրջաններում մտածում են, որ Ռուսաստանի համեմատ' Ադրբեջանում խնդիրներն ավելի շատ են, և եթե լինեն Ռուսաստանի կազմում ու միանան «եղբայր Դաղստանին», ավելի լավ կապրեն: Այդ շրջանների բնակչության մի մասը Մոսկվային ավելի է ապավինում, քան Բաքվին», -գրում է թերթը:

«Ենի Մուսավաթ»-ը նշում է, որ Ադրբեջանում, հատկապես, հյուսիսային շրջաններում արմատական կրոնական տրամադրությունների աճն ավելի հավանական է դարձնում էթնիկ հակամարտության' կրոնականի վերածվելու հնարավորությունը, ինչն առկա է նաև հարավում, որտեղ ազդեցիկ է Իրանի գործոնը:

«Ադրբեջանի մասնատման և թուլացման համար սրանից ավելի «գեղեցիկ» առիթ չի կարող լինել, և այդ գործընթացներն աստիճանաբար ավելի զգայուն հարթություն են տեղափոխվում», -գրում է թերթը: