Ցեղասպանության տարելիցին ընդառաջ Էրդողանը բազմապատկում է սարդանքները. France 24

Հայոց ցեղասպանության հարյուրերորդ տարելիցին ընդառաջ Թուրքիայի նախագահ Ռեջեփ Թայիփ Էրդողանը սկսել է դիմել սադրիչ գործողությունների: Ինչպես հաղորդում է «Արմենպրես»-ը, այս մասին գրում է ֆրանսիական France 24 լրատվականը:

«Որքան մենք մոտենում ենք ապրիլի 24-ին' Հայոց ցեղասպանության հարյուրերորդ տարելիցի հիշատակմանը, նախագահ Էրդողանը բազմապատկում է Երևանի դեմ սադրանքները' հեռանալով հաշտեցման ամենափոքր հույսից»,- գրում է ֆրանսիական լրատվամիջոցը: Այն հիշեցնում է Թուրքիայի նախագահի հրավերը ՀՀ Նախագահ Սերժ Սարգսյանին' ապրիլի 24-ին' Հայոց ցեղասպանության տարելիցի օրը գնալ և մասնակցել Չանաքքալեի մարտերին նվիրված արարողություններին: Իսկ արդեն օրերս' լատինաամերիկյան շրջագայությունների շրջանակներում Էրդողանը հանդես եկավ հայտարարությամբ' մեղադրելով հայերին ու Հայաստանին «իրենց մեկնած օգնության և երկխոսության ձեռքը մերժելու» մեջ:

Ֆրանսիական լրատվամիջոցը փաստում է, որ Էրդողանի նմանօրինակ հայտարարություններն արդյունքն են պաշտոնական Անկարայի վրա Ցեղասպանությունը ճանաչելուն ուղղված ճնշումների: Ու մինչ նախորդ տարվա ապրիլի 23-ին Էրդողանի ուղերձը հայերին շատերը որակեցին որպես թուրքական դիրքորոշման փոքր տեղաշարժ, այդ ամենը մոռացության մատնվեց Թուրքիայի նախագահի վերջին հայտարարություններից հետո:

Թուրքիայի նախագահ Ռեջեփ Թայիփ Էրդողանը հայտարարել է, որ 2015 թվականի ապրիլի 24-ին թուրքական պետությունը մեծ շուքով նշելու է Չանաքքալեի ճակատամարտում հաղթելու 100-րդ տարին: Էրդողանն ընդգծել է, որ այդ օրը Թուրքիա կհրավիրվեն մի շարք պետությունների ղեկավարներ, այդ թվում' ՀՀ նախագահը: Նախագահ Սերժ Սարգսյանը պատասխանեց Էրդողանի հրավերին' նշելով. «...Ի՞նչ նպատակ է սա հետապնդում, եթե ոչ համաշխարհային հանրության ուշադրությունը Հայոց ցեղասպանության 100-ամյա տարելիցի միջոցառումներից շեղելու պարզունակ նպատակ: Մինչ դեռ, մինչև հիշատակի միջոցառում նախաձեռնելը, Թուրքիան շատ ավելի կարևոր պարտականություն ուներ սեփական ժողովրդի և ողջ մարդկության հանդեպ, այն է՝ Հայոց ցեղասպանության ճանաչումն ու դատապարտումը:... Դեռևս մի քանի ամիս առաջ հրավիրել եմ Ձեզ Երևան՝ 2015 թվականի ապրիլի 24-ին միասին հարգելու Հայոց ցեղասպանության անմեղ նահատակների հիշատակը: Մեզ մոտ ընդունված չէ հյուրընկալվել հրավիրվողին՝ առանց սեփական հրավերի պատասխանը ստանալու»: