ԵՏՀ-ն հուսով է, որ ԵՏՄ-ի մաքսային օրենսգիրքը կստորագրվի մինչև 2015 թվականի վերջը

Եվրասիական տնտեսական հանձնաժողովի (ԵՏՀ) մաքսային համագործակցության գծով կոլեգիայի անդամ (նախարար) Վլադիմիր Գոշինը հուսով է, որ Եվրասիական տնտեսական միության (ԵՏՄ) մաքսային օրենսգիրքը կստորագրվի մինչև ընթացիկ տարվա վերջը, տեղեկացնում է «Արմենպրես»-ը՝ հղում անելով ՌԻԱ Նովոստիին:

«Մենք հույս ունենք մինչև 2015 թվականի մարտի 1-ն ստանալու կողմերի դիտողությունները, որպեսզի առաջին կիսամյակում հաշվի առնենք և քննարկենք բոլոր դիտողությունները, այնուհետև դրանք ուղարկենք ստորագրման ընթացակարգի: Մենք հուսով ենք, որ այս տարի նոր փաստաթուղթը կստորագրվի: Եվ 2016 թվականի հունվարի 1-ից կապրենք նոր մաքսային օրենսդրությանը համապատասխան»,- ասել է Գոշինը, որի խոսքն Աստանայում կայացած մամուլի ասուլիսի ժամանակ մեջբերում է «Նովոստի-Կազախստան» գործակալությունը:

Ըստ որում, նա նշել է, որ Մաքսային օրենսգրքի նախագիծը 2014 թվականի դեկտեմբերին ուղարկվել է Մաքսային միության անդամ երկրներ՝ համաձայնեցման համար: «Փաստաթղթի հիմնական նորույթներից են. առաջին, մենք անցնում ենք էլեկտրոնային փաստաթղթաշրջանառության: Մաքսային փաստաթղթաշրջանառությունից գործնականում լիովին բացառվում է թուղթը: Թուղթը հայտնվում է ամենածայրահեղ դեպքերում, երբ չկա էլեկտրականություն, փչացել է համակարգիչը, ֆորս-մաժորային հանգամանքներում»,- իրազեկել է Գոշինը:

«Երկրորդ, ապրանքների ավտոմատ բացթողման հնարավորություն՝ առանց մաքսային տեսուչի մասնակցության: Արտահանման կամ ներմուծման՝ հայտարարված ընթացակարգին համապատասխան ապրանքների բացթողման մասին որոշումը կընդունի մաքսային մարմինների ապարատա-ծրագրային համալիրը: Եթե ոչ 100 տոկոսով, ապա առնվազն 50 տոկոսով՝ առանց մարդու մասնակցության»,- պարզաբանել է նա:

Նրա խոսքով՝ օրենսգրքով նախատեսվում է, որ միայն մաքսային հայտարարագրերի տեսքով կտրվի ներմուծման և արտահանման համար տեղեկությունների ծավալը: «Ոչ մի այլ կարգի փաստաթղթեր, որոնց հիման վրա լրացված է հայտարարագիրը, չեն կցվի: Փաստաթղթերը պետք կգան սոսկ այն դեպքում, եթե գործի ռիսկերի վերլուծության համակարգը»,- հավելել է Գոշինը: