Թուրքական ԶԼՄ-ների անդրադարձը՝ հայ-թուրքական արձանագրությունների հետկանչին

Թուրքական ԶԼՄ-ները ՀՀ նախագահի կողմից ԱԺ-ից հայ-թուրքական արձանագրությունները հետ կանչելուն անդրադարձել են հիմնականում առանց մեկնաբանությունների:

Ինչպես հաղորդում է «Արմենպրես»-ը, մասնավորապես, Haber3 լրատվական կայքը, առանց հրապարակելու Ազգային ժողովի նախագահ Գալուստ Սահակյանին ուղղված նախագահ Սերժ Սարգսյանի նամակը, գրել է, որ ՀՀ նախագահը խորհրդարանից հետ է կանչել 2009 թվականի հոկտեմբերի 10-ին Թուրքիայի և ՀՀ արտգործնախարարների ստորագրած արձանագրությունները: Կայքը հղում է կատարել ՀՀ նախագահի նամակի այն հատվածին, որում նա խոսել է հարաբերությունների հաստատելուն խոչընդոտած Թուրքիայի կողմից առաջ քաշված նախապայմաններին:

Թուրքական Haberler կայքն արձանագրությունները ՀՀ ԱԺ-ից հետ կանչելու մասին լուրը ներկայացրել է որպես Թուրքիայի նախկին նախագահ Աբդուլա Գյուլի մասնակցությամբ սկսված «ֆուտբոլային դիվանագիտության» ավարտ:

Թուրքական Kanal A Haber կայքը տեղեկությունը ներկայացրել է «Հայաստանից ցնցում առաջացնող քայլ» վերնագրով: Vatan թերթը թեմային անդրադարձել է «Երևանը հետ կանչեց հարաբերությունները կարգավորող արձանագրությունները» վերտառությամբ:

Որոշ իշխանամետ կայքեր տեղեկությունը ներկայացրել են այսպես. «Սարգսյանը կարգավորման գործընթացը թաղեց պատմության մեջ»: Իսկ Ankara Haber կայքը, նշելով, թե Սարգսյանը կրկին մեղադրել է Թուրքիային, լուրը ներկայացրել է «Հայաստանի կողմից սադրիչ քայլ» զավեշտալի վերնագրով: