Բերիո հայոց թեմում քննարկվել են սիրիահայության խնդիրները

Բերիո հայոց թեմի ազգային երեսփոխանական ժողովը փետրվարի 20-21-ին, Հալեպի Ս. Աստվածածին եկեղեցու ներքնասրահում, նախագահությամբ Բերիո հայոց թեմի բարեջան առաջնորդ Գերաշնորհ Տ. Շահան Ս. արքեպիսկոպոս Սարգսյանի, գումարել է իր 159-րդ նիստը: Ինչպես «Արմենպրես»-ին տեղեկացրին Բերիո հայոց թեմից, ժողովին մասնակցել են առաջնորդի օգնական Գերապատվե լի Տ. Վահան Ծ. վարդապետ Պերպերյանը, Հալեպի քահանայից դասը, Ազգային վարչության և Ազգային կրոնական ժողովների անդամները, ինչպես նաև Ազգային իշխանության խորհուրդների ատենապետները:

Ժողովն սկսվել է Գերաշնորհ առաջնորդ Սրբազան Հոր աղոթքով և բացման խոսքով: Նա բարձր է գնահատել այն ժողովականներին, որոնք իրենց վերապահված առաքելությանը հավատարիմ՝ հանձնառությամբ լծված են սիրիահայության և թեմական կյանքի զանազան բնագավառներին առնչվող աշխատանքներին, ինչպես նաև գնահատել է սիրիահայության, և, մասնավորապես Հալեպի հայ համայնքի զավակներին, որոնք, ամուր կառչած իրենց ազգային և թեմական բազմաբնոյթ կառույցներին, միասնականությամբ փորձում են շրջանցել սիրիահայությանը վիճակված ծանր դժվարությունները:

Ազգային երեսփոխանական ժողովը տեսաձայնագրության միջոցով ունկնդրել է Մեծի Տանն Կիլիկիո կաթողիկոս Ն.Ս.Օ.Տ.Տ. Արամ Ա.-ի՝ այս առիթով փոխանցված Հայրապետական պատգամը: Վեհափառ Հայրապետը նախ իր Հայրապետական օրհնությունն է փոխանցել, ապա իր խոր գնահատանքը հայտնել Բերիո Հայոց թեմի առաջնորդին, հոգևորական դասին, ժողովրդին և բոլոր ծառայողներին, վերահաստատել է Մեծի Տանն Կիլիկիո կաթողիկոսության գործնական զորակցությունը սիրիահայությանը՝ ընդգծելով Հալեպի՝ սիրիահայության կենտրոնը լինելու հանգամանքը և հալեպահայ համայնքի հեղինակությունը պահելու հ րամայականը:

Վեհափառ Հայրապետը շեշտել է վերադասավորման, վերակազմակերպման ու վերաշխուժացման միջոցով միասնակամությամբ Բերիո Հայոց թեմի և սիրիահայության վերականգման անհետաձգելի գործին լծվելու անհրաժեշտությունը, մանավանդ, երբ Սիրիայի հայ համայնքը իբրև պատմական գաղութ՝ կարևոր տեղ է գրավում ողջ հայության համայքային կյանքում:

Հայոց ցեղասպանության 100-րդ տարելիցին գումարած իր այս նիստում Բերիո Հայոց թեմի ազգային երեսփոխանական ժողովը վերահաստատել է, որ սիրիահայությանը վիճակված ծանր ու տագնապալի մերօրյա կացությունն առավել հաստատակամ կդարձնի մեր ժողովրդին՝ իր պահանջատիրական երթի մեջ:

Ազգային երեսփոխանական ժողովը հանգամանորեն քննության է ենթարկել Սիրիային վիճակված տագնապի հետևանքով սիրիահայության ընդհանրապես և Բերիո հայոց թեմի մեր ժողովրդին կառույցներին և հասարակական կյանքում մասնավորապես, դիմագրաված դժվարությունները և դրանք մեղմացնելու հնարավորությունները:

Ազգային երեսփոխանական ժողովի կազմած չորս աշխատանքային հանձնախմբերը ներկայացրել են չորս զեկույցներ, համապատասխան առաջադրանքներով՝ ժողովրդական տեղաշարժ և հետևանքներ, թեմական կառույցների վերադասավորում, ազգապատկան կալվածքների առանձնացում, տնտեսական կարիքների և հնարավորությունների տնօրինում:

Երկու օրվա ընթացքում ժողովի մասնակիցները քննարկել են վերոհիշյալ հույժ կարևոր խնդիրները՝ համապատասխան հանձնարարականներ տալով գործադիր ժողովներին, որպեսզի սիրիահայությունը, թեմական ժողովուրդը և հատկապես Հալեպի հայ համայնքը կարողանան թոթափել աղետալի ու բացասական հետևանքները, կարողանան հաստատակամ շարունակել իրենց գոյությունը:

Ազգային երեսփոխանական ժողովը, երախտապարտ լինելով տագնապալի շրջանում սիրիահայությանը տրամադրված բոլոր օժանդակությունների համար, ընդգծել է, որ սիրիահայության տագնապը ողջ հայության տագնապն է, և առկա պայմաններից ելնելով, կարևորում է այդ օգնության անհրաժեշտությունը: Ազգային երեսփոխանական ժողովն իր աշխատանքները շարունակելու է գործնական և իրատեսական ծրագրերն իրականացնելու նոր հանձնառությամբ:

Ժողովն ավարտվել է Սրբազան Հոր փակման խոսքով և պահպանիչ աղոթքով: