Թուրքիան Սուլեյման շահի դամբարանի տեղափոխման հարցում պայմանավորվել էր ԻԼԻՊ-ի եվ PKK-ի հետ. The Independent

Սուլեյման շահի դամբարանը թուրք-սիրիական սահմանին ավելի մոտ տարածք տեղափոխելու հարցում Թուրքիան նախապես պայմանավորվածություններ էր ձեռք բերել «Իրաքի և Լևանտի իսլամական պետություն» (ԻԼԻՊ) ահաբեկչական կազմակերպության և Քրդստանի աշխատավորական կուսակցության (PKK) սիրիական թեև Ժողովուրդների դեմոկրատական միասնություն կուսակցության (PYD, YPG) հետ:

Ինչպես հաղորդում է «Արմենպրես»-ը, նման համոզմունք է հայտնել բրիտանական The Independent թերթը' անդրադառնալով Սիրիայի տարածքում Եփրատի կղզիներից մեկում գտնվող Սուլեյման շահի դամբարանն անարյուն թուրք-սիրիական սահմանից 200 մ հեռավորության վրա գտնվող վայր տեղափոխելու Թուրքիայի զինված ուժերի' նախօրեին իրագործած գործողությանը:

Բրիտանական թերթը հիշեցրել է, որ իսլամի հայտնի առաջնորդների դամբարաններն ավերող վահաբի աղանդի հետևորդ ԻԼԻՊ-ը սրանից մոտ մեկ տարի առաջ Սուլեյման շահի դամբարանը դատարկելու համար երեք օր ժամանակ էր տվել Թուրքիային, սակայն, չնայած դրան, կազմակերպությունն այևս չէր անհանգստացրել Անկարային:

Թերթը դա պայմանավորել է այն բանով, որ ԻԼԻՊ-ի զավթած տարածքներում գտնվող նավթահանքերը շահագործվում են թուրք ինժեներների կողմից: Այսինքն' ԻԼԻՊ-ը խոստացել է ձեռք չտալ դամբարանին' թուրք մասնագետների դիմաց: Թերթը չի բացառել, որ դամբարանի տեղափոխումը Թուրքիայի հետ սահման ևս ինչ-որ պայմանավորվածության, միգուցե' ավելի շատ թուրք մասնագետներ հրավիրելու արդյունք էր, քանի որ այն կատարվել էր ոչ ԻԼԻՊ-ի, ոչ էլ այդ տարածաշարջանը վերահսկող քրդերի կողմից որևէ դիմադրություն չցուցաբերելու արդյունքում (մեկ թուրք զինվորը զոհվել էր ոչ մարտական պայմանու մ):

Դամբարանի տեղափոխումը ԻԼԻՊ-ի հետ պայմանավորվածության արդյունք լինելու մասին հայտնել է նաև թուրքական gazeteci.tv ինտերնետային կայքը:

«Սուլեյման շահի դամբարանի տեղափոխումը ԻԼԻՊ-ի հետ նախապես պայմանավորված գործողություն էր: Դա Թուրքիայի իշխող «Արդարություն և զարգացում» կուսակցության (ԱԶԿ) համար պարտություն էր, քանի որ Թուրքիան կորցրեց 94 տարի իր ձեռքում եղած հողը»,-գրել է կայքը:

Քրդական Firat լրատվական գործակալությունն էլհայտնել է, որ դա YPG-ի հետ թուրքական բանակի համատեղ գործողություն էր, ինչի արդյունքում այն տեղափոխվել է PYD-ի վերահկողության տակ գտնվող տարածք: «Գործողությունը կատարվել է YPG-ի հրամատարության տակ գտնվող Քոբանիի մեր ուժերի մասնակցությամբ», -հայտնել է գործակալությունը:

Քննադատելով թուրքական կառավարությանը, «Ջումհուրիեթ» թերթն էլ գրել է, որ Անկարան ԻԼԻՊ-ին և KK-ին ահաբեկչական էր անվանում, սակայն, օսմանյան մասունք հանդիսացող դամբարանի տեղափոխումը կատարում է նրանց հետ համատեղ:

«YPG-ի հետ համատեղ գործողությունը Սիրիայի և սիրիացի քրդերի հետ կապված Թուրքիայի վարած քաղաքականության վերջնական ձախողման ցուցադրությունն է: Դա խոսում է այն մասին, որ այսուհետև Թուրքիան աջակցելու է կամ նվազագույնը' չի խոչընդոտելու տարածաշրջանում ԻԼԻՊ-ի դեմ YPG-ի և PKK-ի գործողություններին», -գրել է թուրքական թերթը:

Թերթը նշել է, որ նման եզրակացության է հագել այն պարզ պատճառով, որ ԱՄՆ-ը ռազմական գործողություն է նախապատրաստում ԻԼԻՊ-ի դեմ, որպեսզի ազատագրի սիրիական Ռաքքա և իրաքյան Քիրկուկ և Մոսուլ ք աղաքները:

«Քոբանիից հետո PKK-ին դաշնակից դարձած ԱՄՆ-ը բանակցությունները վարում է Թուրքիայի զինված ուժերի հետ: ԻԼԻՊ-ի դեմ թուրքական Քիրշեհիր քաղաքում սիրիացի ընդդիմադիրներ վարժեցնելու վերաբերյալ օրերս կնքված թուրք-ամերիկյան համաձայնագիրը ձեռք է բերվել հենց այդ շրջանակում», -նշել է թերթը: