Ամերիկահայ համայնքը Ցեղասպանության 100-րդ տարելիցը կնշի Վաշինգտոնում

Հայոց ցեղասպանության 100-րդ տարելիցի հիշատակի արարողությունները մայրաքաղաք Վաշինգտոնում իրենց գագաթնակետին կհասնեն մայիսի 7-9-ը անցկացվելիք եռօրյա միջոցառումներով: Այս մասին հայտնել է Asbarez-ը:

Բոլոր հայկական եկեղեցիները, հայրենակցական ու բարեգործական կազմակերպությունները և քաղաքական խմբերը կմիավորվեն՝ ամերիկացի ժողովրդին և աշխարհին ներկայացնելու մեկ հզոր ձայն, որը կլինի շեփորականչ ոչ միայն ԱՄՆ-ի, այլև միջազգային հանրության համար:

Հեռախոսազրույցում Ցեղասպանության հիշատակի միջոցառումների ազգային կոմիտեի նախագահ Նուբար Աֆեյան ընդգծել է այդ միասնության շատ կարևոր գաղափարը:

«Բոլոր հայերի համար կա մտավախություն ու անբավարարություն, որ բավականաչափ գործ չենք արել՝ արժանի լինելու 100 տարի առաջ զոհված մարդկանց: Բացի դրանից՝ պետք է երախտագիտություն հայտնենք այն ինստիտուտներին ու մարդկանց, ովքեր նպաստել են մեր գոյատևմանն ու բարեկեցությանը»,- նշել է Աֆեյանը: