ՀՀ պաշտոնաթող նախագահի կենսաթոշակի հարցը կքննարկվի ԱԺ արտահերթ նիստի ընթացքում

Ազգային ժողովի սոցիալական հարցերի մշտական հանձնաժողովը քվեարկությամբ հաստատեց «Հայաստանի Հանրապետության Նախագահի վարձատրության, սպասարկման և անվտանգության ապահովման մասին» ՀՀ օրենքում լրացումներ և փոփոխություն կատարելու մասին օրենքի նախագիծն ԱԺ արտահերթ նիստի օրակարգ ընդգկրելու հարցը: Հանձնաժողովի բոլոր անդամները կողմ արտահայտվեցին օրենքի նախագիծը մարտի 3-ի արտահերթ նիստում ընդգրկելուն:

Հիմնական զեկուցողը' ՀՀ աշխատանքի և սոցիալական հարցերի նախարար Արտեմ Ասատրյանը, ներկայացնելով նախագիծը, ընդգծեց, որ պաշտոնաթողությունից հետո Հայաստանի Հանրապետության Նախագահի համար, բացառությամբ այն դեպքերի, երբ նա պաշտոնանկ է արվում, նշանակվում է հատուկ կենսաթոշակ' Հայաստանի Հանրապետության Նախագահի' օրենքով սահմանված աշխատավարձի 70 տոկոսի չափով: «Հայաստանի Հանրապետության Նախագահի' օրենքով սահմանված աշխատավարձի չափը բարձրանալու դեպքում Հայաստանի Հանրապետության պաշտոնաթող Նախագահի կենսաթոշակը համամասնորեն վերահաշվարկվում է»,- «Արմենպրես»-ի հաղորդմամբ՝ նշեց Ասատրյանը:

Նշված հատուկ կենսաթոշակը չի վճարվում այն ամբողջ ժամանակահատվածում, որի ընթացքում պաշտոնաթող Նախագահը վարում է որևէ ընտրովի կամ նշանակովի պաշտոն և ստանում է Հայաստանի Հանրապետության Նախագահի' օրենքով սահմանված աշխատավարձի 70 տոկոսի չափը գերազանցող վարձատրություն, իսկ այդ չափից ցածր լինելու դեպքում նա ստանում է նշված հատուկ կենսաթոշակի և աշխատավարձի տարբերությունը:

Նախագծով առաջարկվում է նաև սահմանել, որ Հայաստանի Հանրապետության պաշտոնաթող Նախագահը կահավորված գրասենյակով և տրանոպորտային միջոցով և թիկնազորով ապահովվում է ցմահ: