Ալիևին ծառայող թերթն Օբամային «բռնակալ» է անվանել

Ադրբեջանի իշխանությունը խախտել է ԱՄՆ-ի հետ պայմանավորվածությունը' դարձյալ մեկնարկ տալով հակաարևմտյան արշավին, և իշխանամետ թերթերում քննադատություններ հնչեցրել ԱՄՆ-ի նախագահ Բարաք Օբամայի հասցեին:

Այս մասին, ինչպես հաղորդում է «Արմենպրես»-ը, հայտնում է «Ազադլիգ» թերթը' նշելով, որ Բաքուն անմիջապես և խստորեն է արձագանքել «Վաշինգտոն պոստ» թերթում Ադրբեջանի կառավարության դեմ հնչեցրած քննադատություններին:

Ադրբեջանի պետական «Ազերբայջան» և իշխող «Ենի Ազերբայջան» կուսակցության օրգան «Ենի Ազերբայջան» թերթերը երեկ ԱՄՆ-ի և այդ երկրի նախագահ Օբամայի հասցեին խիստ մեղադրանքներ բովանդակող հոդվածներ են հրապարակել:

«Ազերբայջան» թերթում հրապարակված' «ԱՄՆ-ում առանց դատի ձերբակալություն» վերնագրով հոդվածում Օբաման «բռնակալ» է անվանվել, և նշվել է, որ նա աշխարհի նկատմամբ «արյունոտ քաղաքականություն» է վարում:

«ԱՄՆ-ի նախագահ Բարաք Օբաման հզոր գերիշխանության և բռնակալության ախտանիշներ է ցուցադրում: Սեփական ազգային իրավունքները պահպանել, անկախությունն ուժեղացնել, ԱՄՆ-ից տարբերվող մոտեցում ցուցադրել ցանկացող պետությունները, հատկապես' մուսուլմանական երկրները լուրջ ճնշումների են ենթարկվում: Այդ երկրներում իշխանության հեղաշրջումներ են իրականացվում, խթանվում է քաղաքացիական դիմակայությունը, իսկ դրանք արդյունք չտալու դեպքում, նրանց նկատմամբ բռնություններ են իրագործվում: «Ժողովրդավարության» և «բարեկեցության» անվան տակ անցկացվող քաղաքականության աղետալի արդյունքի համար այսօր Աֆղանստանի, Իրաքի, Լիբիայի, Սիրիայի, Եգիպտոսի և այլ երկրների ժողովուրդները պետք է «երախտապարտ» լինեն Օբամային»,- գրել է թերթը:

«Ազերբայջանը» նույնիսկ պնդել է, որ Բարաք Օբաման իր քննադատներին լռեցնում է ձերբակալություններով:

«Քննադատներին լռեցնելուն ուղղված պարոն Օբամայի սիրելի գործիքներից մեկն էլ ձերբակալությունն է' չնայած նրան, որ ԱՄՆ-ի նախագահն իր ելույթներում քիչ է մնում հետ թողնի անգամ ճանաչված իրավապաշտպաններին: Գուանտանամո բանտում մինչ օրս «ահաբեկչության» կամ «ահաբեկչությանն աջակցության» մեջ կասկածելի համարվող անձինք են պահվում: Նրանց թվի, կատարած հանցագործությունների, բանտային պայմանների մասին ոչ մի տեղեկություն չկա, քանի որ պարոն Օբաման իր նախորդների պես ավելորդ է համարում նրանց նկատմամբ արդարացի դատավարության անցկացումը: Ավելին, ձերբակալում և բանտեր է նետում առկա վիճակը քննադատող լրագրողներին և ակտիվիստներին….Սրանք բոլորը իր ընդդիմախոսների դեմ Վաշինգտոնի ցուցադրած դաժան վերաբերմունքի ապացույցներ են»,- գրել է «Ազերբայջանը»:

Նման մեղադրանքներով հանդես է եկել «Ենի Ազերբայջան» թերթը նույնպես իր' «Կեղտոտ քաղաքականության պատանդ «Վաշինգտոն պոստը» վերնագրով հոդվածում:

«Ազադլիգը» գրում է, որ ԱՄՆ պետքարտուղարի Եվրոպայի և Ասիայի հարցերով օգնական Վիկտորիա Նուլանդի' Բաքու այցից հետո Ադրբեջանի և Վաշինգտոնի միջև ջերմացում էր սկսել դիտվել, ինչի պատճառն այն էր, որ այցի ժամանակ Նուլանդը հանդես էր եկել դեմոկրատական բարեփոխումներ անցկացնելու ուղղությամբ Ադրբեջանի իշխանության ջանքերին աջակցելու պատրաստակամության մասին հայտարարությամբ: «Սակայն, երևում է, իշխանությունն այդ համաձայնությունը խախտելու առիթ էր որոնում: «Վաշինգտոն պոստ» թերթի քննադատական հոդվածը իշխանության համար երկնքից ընկ ած մանանա դարձավ»,- գրել է «Ազադլիգը»:

«Վաշինգտոն պոստն» ավելի վաղ գրել էր, որ Ադրբեջանի նախագահ Իլհամ Ալիևը «խելահեղ բռնակալության հատկանիշներ» է ցույց տալիս: Այդ երկրում ձերբակալությունների ալիքն իր հետ տանում է լրագրողներին, բլոգերներին, փաստաբաններին, իրավապաշտպաններին և նրանց, ովքեր հանդես են գալիս ի պաշտպանություն աձնական ազատության, իսկ Ալիևը, խնդիրներ ունենալով նավթային եկամուտների անկումից, որոնց վրա երկար տարիներ հենվել էր նրա վարչակարգը, երևում է, հարված է հասցնում յուրաքանչյուրին, ով դեմ է հանդես գալիս իրեն: