ԵՏՄ-ն մշակում է Կալինինգրադից և Հայաստանից ապրանքների տեղաշարժման սկզբունքները

Եվրասիական տնտեսական միության երկրները մտադիր են մշակել Ռուսաստանի Կալինինգրադի մարզից և Հայաստանից միության մնացած տարածք ապրանքների տեղաշարժման կարգը: Այդ մասին, ինչպես տեղեկացնում է «Արմենպրես»-ը, մարտի 6-ին Մինկում հայտնել է Եվրասիական տնտեսական հանձնաժողովի մաքսային համագործակցության նախարար Վլադիմիր Գոշինը:

Բելառուսը դեկտեմբերից ի վեր կալանել է Կալինինգրադի մարզից հեռուստատեսային տեխնիկա տեղափոխող շուրջ 30 ավտոմեքենա, որը վաճառելու էին տանում Մոսկվա: Տեխնիկայի մի մասը կալանված է: Բելառուսի մաքսավորները ձեռնարկություններին կասկածել են այն բանում, որ նրանք ոչ թե արտադրում, այլ միայն լեգալացնում են չինական ապրանքը Մաքսային միությունում: Կալինինգրադի բիզնեսի ներկայացուցիչները հայտարարել են, որ Բելառուսի մաքսատունը կալանել է նաև այն դատարկ բեռնատարները, որոնք Կալինինգրադի մարզից հեռուստատեսային տեխնիկա էին փոխադրել Ռուսաստանի տարածաշրջաններ և հետ էին վերադառնում:

«Մենք համաձայնագրի նախագիծ ենք մշակել Կալինինգրադի մարզից Մաքսային միության մնացած տարածք ապրանքների տեղաշարժման կարգի վերաբերյալ: Այժմ այն փոփոխություններ կկրի, քանի որ համանման վիճակում է հայտնվել Հայաստանը (սահմաններ չունի Միության հետ)»,- ասել է Գոշինը:

Ըստ ՌԻԱ Նովոստիի, նա հավելել է, որ ապրանքների տեղաշարժման կարգն ամբողջությամբ կկանոնակարգվի այդ համաձայնագրով: