Բաքու մեկնող մարզիկները կդառնան վարչակարգի խաղածոն. Frankfurter Algemeine

Բաքվում հունիսին անցկացվելիք Եվրոպայի ամառային խաղերի մոտենալու հետ' միջազգային մամուլը, իրավապաշտպան կազմակերպությունները հայտնում են Ադրբեջանում առկա հասարակական-քաղաքական աղետալի վիճակի պայմաններում, մարդու իրավունքներն ու ազատությունները սահմանափակած երկրում մարզական մրցարշավ անցկացնելու անընդունելի լինելու մասին:

Եվրախաղերի շեմին Ադրբեջանում մարդու իրավունքների ցավալի վիճակի, քննադատող լրագրողների, իրավապաշտպանների դեմ բռնաճնշումների մասին բազմաթիվ հոդվածներ են հրապարակել նաև Մեծ Բրիտանիայի և Գերմանիայի ազդեցիկ մամուլի օրգանները: Բոլոր այդ հոդվածներում նշվում է, որ Ադրբեջանի կառավարությունը, կոնկրետ՝ նախագահ Իլհամ Ալիևը, օգտվելով նման միջոցառումներից, աշխատում են իրենց համար լավ վարկանիշ ձևավորել:

Ինչպես հաղորդում է «Արմենպրես»-ը, գերմանական Frankfurter Algemeine թերթը, մասնավորապես, գրում է, որ այն փաստը, որ խաղերին մասնակցելու համար Բաքու ժամանող բոլոր հավաքականների և պատվիրակությունների մոտ 6 հազար անդամների բոլոր ծախսերն ադրբեջանական կառավարությունը վերցրել է իր վրա, խոսում է այն մասին, որ Ադրբեջանում առկա ոչ ժողովրդավար վիճակն անտեսող կազմակերպություններն ու մարզիկները վերածվելու են ալիևյան ռեժիմի մարիոնետների' խաղածոների, և դա դեռ սկիզբն է:

«1969 թվականից Ադրբեջանը ղեկավարում է Ալիևների ընտանիքը: Իլհամ Ալիևը 1997 թվականից հանդիսանում է Ադրբեջանի ազգային օլիմպիական կոմիտեի ղեկավարը, իսկ 2003 թվականից' երկրի նախագահը: Ակնհայտ է կենսական նշանակություն ունեցող նրա պլանը և այն, որ նա կարծում է, թե փողով կարող է ամեն ինչ անել: Ալիևը որոշել է վճարել Բաքու ժամանող 6 հազար մարզիկների բոլոր ծախսերը: Ադրբեջանի ռեժիմի հաշվին այդ խաղերին մասնակից բոլորը, որոնք անտեսում են, որ այդ երկրում ձերբակալվում են ընդդիմադիր հայացքներով մարդիկ, մամուլի ազատությունը խեղդվում է, մամուլի ազատության վարկանիշով Ադրբեջանը գտնվում է 162-րդ տեղում' Սաուդյան Արաբիայի և Բելառուսի հետ նույն շարքում, վերածվելու են ռեժիմի մարիոնետների: Սա դեռ սկիզբն է: Նախագահական պալատում ծրագրեր են մշակվում հերթական ձեռնարկումների համար: Հնարավոր է' 2024 թվականի օլիմպիադան շահելու համար Բաքուն մրցակից դառնա Բեռլինին և Համբուրգին: Ալիևի «անհոգ հրավերի» առաջարկը գրավիչ է երեում: Ո՞վ կարող է առաջարկել վճարել 6 կամ 10 հազար մարզիկի բոլոր ծախսերը…»,- գրում է թերթը: