Արամ Ա կաթողիկոսը ողջունել ու բարձր է գնահատել 100 LIVES նախաձեռնությունը

Մեծի Տանն Կիլիկիո Արամ Ա կաթողիկոսը ողջունել և բարձր է գնահատել 100 LIVES («100 կյանք») նախաձեռնությունը: «Բարձր ենք գնահատում Հայոց ցեղասպանության 100-րդ տարելիցի միջոցառումների շրջանակում «100 կյանք» մարդասիրական նախաձեռնությունը: Այն հատուկ ուշադրության արժանի նախաձեռնություն է, որը ոչ միայն միջազգային մակարդակով լուսարձակի տակ է բերում հայ ազգի զավակների հավատարմությունը նահատակների կտակին և բարձրաձայնում է մեր պահանջատիրությունը, այլև, վստահ ենք, որ մղիչ ուժ կհանդիսանա, որպեսզի միջազգային բարձր համբավ վայելող անձիք զորակցեն մեր ժողովրդին և մեզ հետ միասին պահանջեն մեր ոտնահարված իրավունքների ճանաչումը»,- «Արմենպրես»-ի հաղորդմամբ' ինչպես տեղեկացնում է «Հայաստանի զարգացման նախաձեռնություններ» (IDeA) հիմնադրամի հանրային կապերի բաժինը, ընդգծել է Արամ Ա կաթողիկոսը:

«Հայրապետական օրհնության այս գիրով ողջունում ենք Ռուբեն Վարդանյանի ազգանվեր նախաձեռնությունը և մաղթում, որ այն հաջողությամբ պսակվի ու իրագործի իր նպատակը»,- նշվում է կաթողիկոսի ողջույնի խոսքում:

Ն.Ս.Օ.Տ.Տ. Գարեգին Բ ծայրագույն պատրիարք և Ամենայն Հայոց կաթողիկոսը և Հայոց ցեղասպանության 100-րդ տարելիցի միջոցառումները համակարգող պետական հանձնաժողովի քարտուղար, ՀՀ նախագահի աշխատակազմի ղեկավար Վիգեն Սարգսյանը ևս ողջունել են «100 կյանք» նախաձեռնությունը:

100 LIVES (100Կյանք) նախաձեռնությունը կոչված է երախտիքի տուրք մատուցելու այն անհատներին ու կազմակերպություններին, որոնք 100 տարի առաջ հերոսական ջանքերի գնով հարյուր հազարավոր հայերի են փրկել Հայոց ցեղասպանությունից։ 100 LIVES-ը նախաձեռնել են հայտնի գործարարներ և բարերարներ Ռուբեն Վարդանյանն ու Նուբար Աֆեյանը և Նյու Յորքի Քարնեգի հիմնադրամի նախագահ Վարդան Գրեգորյանը։ Գնահատելով ու խոնարհվելով վերապրածների և նրանց փրկողների առաջ՝100 LIVES նախաձեռնությունը սահմանել է «Ավրորա» մրցանակ՝ մերօրյա ա նձնազոհ մարդկանց աջակցելու և խրախուսելու նպատակով: