Բլերը կթողնի Մերձավոր Արևելքի խնդրով հատուկ ներկայացուցչի պաշտոնը. Guardian

Մեծ Բրիտանիայի նախկին վարչապետ Թոնի Բլերն այս շաբաթ կթողնի մերձավորարևելյան հակամարտության կարգավորման խնդրով միջնորդների «քառյակի» (ՌԴ, ԵՄ, ԱՄՆ և ՄԱԿ) հատուկ ներկայացուցչի պաշտոնն այն մեղադրանքների պատճառով, որ քաղաքական գործիչն ավելի շատ ուշադրություն Է դարձնում բիզնես-շահերին, քան հակամարտության լուծման աշխատանքին: Այդ մասին, ինչպես տեղեկացնում Է «Արմենպրես»-ը, մարտի 15-ին գրել Է բրիտանական Guardian թերթը:

«Նախկին վարչապետը պատրաստվում Է փոխել «քառյակի» ներկայացուցչի դերը. նրա այդ որոշման մասին կարող Է հայտարարվել այս շաբաթ: Աղբյուրները հայտնում են, որ նա արդեն բանակցությունները Է սկսել իր կարգավիճակը փոխելու շուրջ, սակայն դեռևս ընդգրկված Է մնում կարգավորման գործընթացում: Նա պետք Է հանդիպում ունենա ԱՄՆ-ի Պետդեպարտամենտի ղեկավար Ջոն Քերիի և ԵՄ-ի դիվանագիտության ղեկավար Ֆեդերիկա Մոգերինիի հետ, որպեսզի քննարկի աշխատանքի հնարավոր փոփոխման հարցը»,-գրում Է հրատարակությունը:

Guardian-ի տեղեկատվության համաձայն՝ շատ փորձագետներ ու քաղաքական գործիչներ, որոնք ներգրավված են խաղաղ կարգավորման գործընթացում, անհանգստացած են մերձավորարարելյան հակամարտության կարգավորման գործում Բլերի դերակատարության վրա նրա բիզնես-շահերի ազդեցությունից:

Ինչպես նշում Է ՌԻԱ Նովոստին, անցյալ տարի Մեծ Բրիտանիայի մի շարք նախկին դեսպաններ «քառյակի» հատուկ ներկայացուցչի պաշտոնից Բլերին հետ կանչելու կոչով Էին հանդես եկել հենց նրա ձեռնարկատիրական գործունեության կապակցությամբ, ինչպես նաև այն բանի պատճառով, որ նախկին վարչապետը կտրականապես հրաժարվել Էր ստանձնել Իրաքում ԱՄՆ-ի և Մեծ Բրիտանիայի կողմից սանձազերծված պատերազմի պատասխանատվությունը: