Հայաստանի անդամակցումը ԵՏՄ-ին չի նշանակում վերջ դնել ԵՄ-ի հետ համագործակցությանը

Տնտեսություն 16 Մարտ, 2015 17:37

Եվրասիական տնտեսական միությանն անդամակցելու որոշումից հետո Հայաստանի կառավարության համար պետք է օրակարգային լինի ԵՄ Ասոցացման համաձայնագրից բխող մնացած գործողությունների լիարժեք իրականացումը՝ ապահովելով օրենքի գերակայության և ժողովրդավարության ոլորտներում բարեփոխումների իրականացումը: Այս մասին Ազգային ժողովում լրագրողների հետ զրույցում ասաց Արևելյան գործընկերության քաղաքացիական հասարակության ֆորումի կոմիտեի համանախագահ Քշիշտոֆ Բոբինսկին: «Հայաստանի կառավարությունը պետք է լիարժեք իրականացնի մնացած բոլոր գործողությունները, որոնք բխում են Ասոցացման համաձայնագրից: Պետք է շարունակվեն բարեփոխումները ժողովրդավարության, օրենքի գերակայության ապահովման բնագավառներում, որոնք կարող են ապահովել ինտեգրումը եվրոպական արժեքներին»,- «Արմենպրես»-ի հաղորդմամբ՝ նշեց Բոբինսկին:

Հարցին, թե հնարավո՞ր է, որ Ռիգայում կայանալիք ԵՄ գագաթնաժողովի ընթացքում Հայաստանի և Եվրամիության միջև համագործակցության նոր փաստաթուղթ ստորագրվի, նա ընդգծեց, որ ՀՀ կառավարությունը բանակցում է Եվրամիության հետ, թե հետագա համագործակցության համար ինչ փաստաթուղթ կարելի է ստորագրել: «Այս դեպքում գալիք երկու ամսվա ընթացքում անհրաժեշտ է ոչ միայն Հայաստանի ղեկավարության քաղաքական կամքը, այլ նաև Եվրամիության անդամ 28 երկրի համաձայնությունը, որը, որքան ես եմ հասկանում, այս պահին դեռևս ձեռք բերված չէ: Եվ եթե Ռիգայում նախատեսվում է ստորագրել համագործակցության վերաբերյալ որևէ փաստաթուղթ, պետք է հաշվի առնել նաև այն հանգամանքը, որ գագաթնաժողովին քիչ ժամանակ է մնացել»,- ասաց Բոբինսկին:

Նա շեշտեց, որ Եվրասիական տնտեսական միությանն անդամակցելու որոշումը չի նշանակում, որ Հայաստանը վերջ է դնում Եվրամիության հետ հարաբերություններին: «Համաձայն չեմ այն մտքի հետ, որ Արևելյան գործընկերության ծրագրի քաղաքականությունը պետք է փոխել, որովհետև այն սխալ է աշխատել, այլ անհրաժեշտ է վերանայել այդ քաղաքականությունը, որովհետև տեղի են ունեցել լուրջ փոփոխություններ: Սակայն իրավիճակը ցույց է տալիս, որ Եվրոպան այս պահին ավելի հետաքրքրված է արևելյան գործընկերության երկրներով, քան 5-6 տարի առաջ»,- եզրափակեց Քշիշտոֆ Բոբինսկին: