Ազնավուրի 73-ամյա երկրպագուհի Լիդա տատիկը սիրում է նաև հայերեն երգել

Շառլ Ազնավուրի երկրպագուհի թոշակառու Լիդա տատիկը, ով հայտնի էր դարձել երգչի նկատմամբ իր տածած սիրով, պարզվում է, շանսոնյեի երգերից բացի, շատ է սիրում կատարել նաև հայկական երգեր, թեև երբեք Հայաստանում չի եղել: Ինչպես հաղորդում է «Արմենպրես» -ը' այս մասին նշվում է ռուսական ren.tv հեռուստաընկերության պատրաստած տեսանյութում:

Ավելի վաղ ռուս լրագրող Ալեքսանդր Չեռնիխը «Facebօok» սոցիալական ցանցում տեղադրել էր մի տեսահոլովակ, որտեղ Լիդա տատիկը մետրոյում երգում էր շանսոնյեի երգերից մեկը' նվիրված Էդիտ Պիաֆին: Բլոգերների ակտիվության շնորհիվ այդ պատմությունը հասել է Ազնավուրի մոսկովյան համերգի (այն կայանալու է ապրիլի 22-ին) կազմակերպիչներին և հենց շանսոնյեին: «Եթե այդ երգերը 17-ամյա աղջնակ երգեր, դա շատ բնական կլիներ, սակայն տատիկը, որ անգամ ֆրանսերեն չգիտի, անգիր գիտի բոլոր երգերը: Ես ոչ միայն ցանկանում եմ նրան իմ համերգին հրավիրել, այլև ընթրիքի: Շատ եմ ցանկանում նրա հետ ծանոթանալ»,- ասել էր Ազնավուրը: Մեծանուն երգչին նաև շատ դուր է եկել Լիդա տատիկի ձայնը' նմանեցնելով այն Էդիտ Պիաֆի ձայնին:

Լիդիա Իվանովնան 73 տարեկան է: Նա սիրում է երգել սիրո և երջանկության մասին, ահա թե ինչու նրա կուռքը հենց Շառլ Ազնավուրն է: Իմանալով, որ Լիդիա Իվանովնան սիրում է նաև հայերեն երգեր կատարել՝ շանսոնյեն այս կապակցությամբ ասել է. «Ես նույնպես սիրում եմ հայկական երգերը: Թեև նա միայն ռուսերեն է խոսում, բայց համոզված եմ, մենք զրուցելու ընդհանուր բան կգտնենք: Մենք պարզապես կերգենք միասին՝ ֆրանսերեն կամ հայերեն»: