Ավելի շատ իրավապաշտպաններ ձերբակալելու մրցույթում Ալիևի կառավարությունը մեդալակիր կլիներ. La Republica

Ադրբեջանում ալիևյան ռեժիմի հետ ջերմ հարաբերություններ ունեցող փոքրաթիվ երկրներից՝ Իտալիայի մայրաքաղաք Հռոմում օրերս տեղի ունեցած Եվրոխաղերի շնորհանդեսի արարողության միջոցառումից մեկ շաբաթ չանցած, իտալական մամուլն անդրադարձել է Ադրբեջանի կառավարության՝ սեփական ժողովրդի նկատմամբ բռնաճնշումներին:

Ինչպես հաղորդում է «Արմենպրես»-ը, նշելով այս մասին, «Ազադլըգ»-ը գրել է, որ իտալական հեղինակավոր La Republica-ն հրապարակել է Եվրոխաղերը հյուրընկալող Ադրբեջանում մարդու իրավունքների աղետալի վիճակը նկարագրող հոդված, որը վերնագրել է՝ «Ադրբեջանը Եվրոխաղերին պատրաստվում է կոշտ ռեպրեսիաներով»:

Հոդվածում իտալական թերթը մեջբերել է Amnesty International-ի Եվրոպայի և Կենտրոնական Ասիայի գծով ծրագրերի տնօրեն Ջոն Դալհաուզենի հետևալ խոսքը. «Պետք չէ խաբվել Եվրոխաղերն անցկացնող Բաքվի շողշողուն տեսքին: Ադրբեջանի կառավարությունը նպատակադրվել նման փայլով արտասահմանյան ներդրումններ ներգրավել և միջազգային հանրության առաջ իրեն ներկայացնել իրականից տարբերվող կերպով: Ադրբեջանի կառավարությունն աշխարհի ամենառեպրեսիվ ռեժիմներից մեկն է: Եթե ավելի շատ իրավապաշտպան և ակտիվիստ ձերբակալվելու գծով մրցույթ անցկացվեր, կասկած չկա, որ Ալիևի կառավարությունը մեդալ կշահեր»:

Թերթը գրել է, որ ներկայումս Ադրբեջանի բանտերում նվազագույնը 22 խղճի բանտարկյալ կա: Նրանց նկատմամբ խարդախության, յուրացման, պետական դավաճանության և այլ շինծու մեղադրանքներ են առաջադրվել: Անցյալ տարվա հունիսին Ալիևը ԵԽԽՎ-ի ամառային նստաշրջանում ունեցած ելույթից հետո, որտեղ նա եվրոպացիներին հավատացնում էր, թե իր երկրում ապահովված են արտահայտվելու, հավաքվելու, միավորվելու ազատությունները, 90-ից ավելի իրավապաշտպաններ, լրագրողներ, քաղաքական հասարակական ակտիվիստներ են ձերբակալվել: Ադրբեջանում քաղաքացիական հասարակությունը կաթվածահար վիճակում է:

«Նավթի գործոնի պատճառով միջազգային հանրությունը աչք է փակում Ադրբեջանում ռեպրեսիաների, մարդու իրավունքների խախտումների վրա: Իսկ դա բանտերում գտնվողների նկատմամբ անհարգալից վերաբերմունք է», -ասել է Դալհաուզենը:

«Amnesty International-ն էլ Ադրբեջանի կառավարությանը կոչ է արել անմիջապես ազատ արձակել բոլոր խղճի բանտարկյալներին և վերջ դնել ազատ խոսք արտահայտող քաղաքացիների բռնաճնշումներին»,- գրել է La Republica-ն: