Ավստրալիայի վարչապետը մասնավոր երեկույթի մեկնել է ՌՕՈՒ-ի ինքնաթիռով. The Herald Sun

Ավստրալիայի վարչապետ Թոնի Էբոթը մասնավոր երեկույթին մեկնել է ռազմաօդային ուժերի ինքնաթիռով, գրում է The Herald Sun պարբերականը:

Միջոցառումն անցկացվել է Մելբուրնում միլիոնատեր և իշխող Լիբերալ կուսակցության խոշոր դոնորներից մեկի` Փոլ Մարքսի ծննդյան կապակցությամբ:

Նշվում է, որ վարչապետը կիրակի Բրիսբենից մեկնել է Սիդնեյ, այնուհետև մի խումբ մարդկանց հետ մեկնել է Մելբուրն ՌՕՈՒ-ի VIP-ինքնաթիռով:

Մարքսի ծննդյան օրը նշվել է էլիտար գոլֆ-ակումբում: Երեկույթին մասնակցել է մոտ 45 մարդ:

Էբոթի մամուլի խոսնակը հայտարարել է, որ նախորդ կիրակի վարչապետը Մելբուրնում այլ գործեր նույնպես ունեցել է, որոնք կապված են եղել աշխատանքային հարցերի լուծման հետ, և բոլոր տեղափոխություններն իրականացվել են կանոնների շրջանակում: Թե հատկապես ինչ աշխատանքային հարցեր է ունեցել վարչապետը Մելբուրնում, պաշտոնյայի ներկայացուցիչը չի պարզաբանել:

Մարքսը հրաժարվել է պատասխանել երեկույթի հետ կապված հարցերին: