Կարմիր խաչը ջրային ռեսուրսների օգտագործման ոլորտում մի շարք ծրագրեր է իրականացնում Տավուշում

ՏԿԱԻ նախարար Արմեն Երիցյանը մարտի 25-ին ընդունել է Կարմիր խաչի միջազգային կոմիտեի պատվիրակության ղեկավար Սարա Էպրեխտին: Սա տիկին Էպրեխտի առաջին այցն է ՏԿԱԻՆ:

Ողջունելով հյուրին՝ նախարար Երիցյանը ներկայացրել է ՏԿԱԻՆ-ի ընդհանուր գործունեությունը տարածքային կառավարման և արտակարգ իրավիճակների ոլորտներում:

Ներկայացնելով Կարմիր խաչի գործունեությունը սահմանամերձ գյուղերում՝ Սարա Էպրեխտը նշել է, որ Կարմիր խաչը ջրային ռեսուրսների օգտագործման և գյուղատնտեսության ոլորտներում մի շարք ծրագրեր է իրականացնում Տավուշի 12 սահմանամերձ համայնքներում: «Կարմիր խաչը հիմնականում զբաղվում է ռազմական գործողությունների ժամանակ բնակչության քաղաքացիական պաշտպանության հարցերով, սակայն մեր կազմակերպության շրջանակներում գործող «Ազգային ընկերություն»-ը զբաղվում է նաև բնական աղետների ժամանակ քաղաքացիների պաշտպանության ծրագրերով»,-ասել է Սար ա Էպրեխտը՝ նշելով, որ իրենք սերտորեն համագործակցում են ՀՀ պաշտպանության նախարարության հետ, որն առաջին գծում է, սակայն երկրորդ գծում այս հարցում հենց ՏԿԱԻՆ-ն է իր փրկարար ծառայությամբ, ուստի համագործակցությունը ՏԿԱԻՆ-ի հետ նույնպես շատ կարևոր է:

Նախարար Երիցյանը նշել է, որ Հայաստանի մարզերում արդեն գործում են Ճգնաժամային կառավարման կենտրոններ, որոնք նաև միտված են փրկարարական համակարգի ապակենտրոնացմանը: «Մեր համար մեկ խնդիրն է այսօր բնակչության իրազեկումը, ինչի ուղղությամբ էլ լուրջ աշխատանքներ են տարվում: Մեր Ճգնաժամային կառավարման կենտրոնն այսօր համապատասխանում է միջազգային բոլոր չափանիշներին, ինչպես նաև՝ աղետների դեպքում ամբողջ բնակչությանը միանգամից իրազեկելու հնարավորություն ունենք»,-ասել է Արմեն Երիցյանը՝ նշելով, որ նախարարությունը պատրաստ է բոլոր հարցերում սերտորեն համագործակցել Կարմիր խաչի հետ:

Նախարարը շեշտել է, որ ՀՀ կառավարությունը հատուկ ուշադրության կենտրոնում է պահում Հայաստանի 32 սահմանամերձ գյուղերը՝ 50%-ով թեթևացնելով գյուղացիների ոռոգման ջրի, գազի և հոսանքի ծախսերը և 100%-ով ազատելով վերջիններիս հողի հարկից: «Կառավարության կարևորագույն խնդիրներից է այսօր համայնքների համաչափ զարգացումը, սրան է միտված նաև համայնքների խոշորացման ծրագիրը»,-նշել է Արմեն Երիցյանը:

Շնորհակալություն հայտնելով ջերմ ընդունելության և սերտ համագործակցության պատրաստակամության համար՝ տիկին Էպրեխտը նախարար Երիցյանին խնդրել է նշանակել նախարարության և Կարմիր խաչի համատեղ աշխատանքը համակարգող պատասխանատու:

Հանդիպման ավարտին ՏԿԱԻ նախարարը Սարա Էպրեխտին ցույց է տվել ՏԿԱԻՆ-ի սերվերային կենտրոնն ու ծանոթացրել Ճգնաժամային կառավարման կենտրոնի ընթացիկ աշխատանքներին: