Հունաստանը մտադիր է օգնություն խնդրել Ռուսաստանից. Spiegel

Հույն քաղաքական գործիչները մտադիր են տնտեսական օգնություն խնդրել Ռուսաստանից Մոսկվա կատարելիք իրենց պաշտոնական այցի ընթացքում, հաղորդում է «Արմենպրես»-ը՝ հղում անելով Spiegel հանդեսին:

«Հունաստանն ամեն կերպ պայքարում է սնանկացման դեմ: Քանի որ հովանավորների հետ բանակցություններն ընդհատվել են, այժմ Աթենքն օժանդակություն է փնտրում Ռուսաստանում: Բրյուսելում եւ Բեռլինում անվստահությամբ են հետեւում մերձեցման փորձերին»,- գրել է հրատարակությունը:

Spiegel-ի տվյալներով՝ Ալեքսիս Ցիպրասի կառավարությունը ցանկանում է խնդրել բնական գազի գնի իջեցման, ինչպես նաեւ որոշ հունական մթերքների, մասնավորապես, թարմ մրգերի համար Ռուսաստանի սահմանած բռնարգելքի վերացման մասին:

Սպասվում է, որ Հունաստանի էներգետիկայի նախարար Պանայոտիս Լաֆազանիսը եւ խորհրդարանական Տանասիս Պետրակոսը այս խնրդանքը կհնչեցնեն Մոսկվա կատարելիք իրենց այցի ընթացքում, որը պլանավորված է մարտի 30 – 31-ը: Պետրակոսը Spiegel-ին պարզաբանել է, թե իր երկրի համար որքան է կարեւոր այդ այցը: «Մենք ցանկանում ենք Ռուսաստանի հետ խորացնել մեր հարաբերություններն էներգետիկայի ոլորտում եւ հուսով ենք զգալի օգուտ ստանալ դրանից»,- հայտարարել է նա:

Եվրամիությունն անհանգստացած է այն փաստից, որ Հունաստանի կառավարության շատ ներկայացուցիչներ իրենց «ավելի մոտ են զգում Մոսկվային, քան Բրյուսելին», նշում է Spiegel-ը: Անհանգստությունը կապված է այն մտքի հետ, որ Վլադիմիր Պուտինը կարող է ուժեղացնել իր ազդեցությունը Հարավարեւելյան Եվրոպայում:

Ավելի վաղ Բրյուսելը մերժել է Հունաստանին 1,2 միլիարդ եվրոյի վարկ տրամադրելու հարցում: Անմիջականորեն Մոսկվա կատարելիք այցից առաջ էներգետիկայի նախարար Լաֆազանիսը հարցազրույց է տվել, որտեղ Եվրամիությանը համարել է «անխիղճ իմպերիալիստ», որը ձգտում է «խեղդել» Հունաստանը:

Հունաստանի վարչապետ Ալեքսիս Ցիպրասը մտադիր է Մոսկվա այցելել ապրիլի 8-ին: Իր այցի շրջանակներում Ցիպրասը պլանավորում է հանդիպել Վլադիմիր Պուտինի հետ, հաղորդել է «Ինտերֆաքս»-ը: