Ուկրաինայի հայոց թեմի առաջնորդ է նշանակվել Տեր Մարկոս եպիսկոպոս Հովհաննիսյանը

Ն.Ս.Օ.Տ.Տ. Գարեգին Բ ծայրագույն պատրիարք և Ամենայն Հայոց կաթողիկոսի հայրապետական տնօրինությամբ Գերաշնորհ Տ. Մարկոս եպիսկոպոս Հովհաննիսյանն ազատվել է Գեղարքունյաց թեմի առաջնորդի պաշտոնից և նշանակվել Ուկրաինայի հայոց թեմի առաջնորդ: Այս մասին տեղեկացնում են Մայր Աթոռի տեղեկատվական համակարգից:

Տ. Մարկոս եպիսկոպոս Հովհաննիսյանը ծնվել է 1973թ. Անիի շրջանի Բարձրաշեն գյուղում: 1990թ. ավարտել է Էջմիածնի թիվ 5 միջնակարգ դպրոցը: 1990-1996թթ. սովորել է Մայր Աթոռ Սուրբ Էջմիածնի Հոգևոր ճեմարանում: 1996թ. ծառայության է նշանակվել «Ալեք և Մարի Մանուկյան» գանձատանը: 1996թ. ձեռնադրվել է սարկավագ ձեռամբ' Գերաշնորհ Տ. Անանիա եպիսկոպոս Արաբաջյանի: 1998-2000թթ. որպես հոգևոր սպասավոր ծառայել է Ազգային բանակում: 2000թ. փետրվարի 29-ին ձեռնադրվել է կուսակրոն քահանա' ձեռամբ Գերաշնորհ Տ. Շահե արքեպիսկոպոս Աճեմյանի: 2000-2001թթ. վարել է Մայր Աթոռի պարետի պաշտոնը: 2001 -2002թթ. սպասավորել է Ռուսաստանի և Նոր Նախիջևանի հայոց թեմում որպես առաջնորդի օգնական, այնուհետև նշանակվել է Ռիգայի Ս. Գրիգոր Լուսավորիչ եկեղեցու հոգևոր հովիվ: 2003թ. ընդունվել է Մոսկվայի Ս. Տիխոնի անվան Աստվածաբանական ինստիտուտի ասպիրանտուրա: 2005թ. պաշտպանել է վարդապետական թեզ «Վիմագիր արձանագրությունները եկեղեցագիտական տեսանկյունով» թեմայով և ստացել մասնավոր վարդապետության աստիճան: 2005թ. Ն.Ս.Օ.Տ.Տ. Գարեգին Բ Ամենայն Հայոց կաթողիկոսի բարձր տնօրինությամբ նշանակվել է Գեղարքունյաց թեմի առաջնորդական տեղապահ:

2006թ. նոյեմբերի 19-ին' ձեռամբ Ն.Ս.Օ.Տ.Տ. Գարեգին Բ Ամենայն Հայոց կաթողիկոսի, օծվել է եպիսկոպոս և շարունակել ծառայությունը Գեղարքունյաց թեմում իբրև առաջնորդ: 2008թ. առ այսօր Համաշխարհային և ավանդական կրոնների առաջնորդների համագումարի (Աստանա, Ղազախստան) կազմկոմիտեի մշտական անդամ է: 2009թ. ՀՀ նախագահ Սերժ Սարգսյանի հրամանագրով նշանակվել է ՀՀ Հանրային խորհրդի անդամ: 2009թ. առ այսօր Եկեղեցիների համաշխարհային խորհրդի հայաստանյան կլոր սեղան միջեկեղեցական բարեգործական հիմնադրամի հոգաբարձուների խորհրդի նախագահն է: