Costa Concordia զբոսանավում կոկաինի խոշոր խմբաքանակ է եղել. La Republica

Costa Concordia զբոսանավում, որը 2012 թվականին խորտակվել է Իտալիայի ափերի մոտ, կոկաինի խոշոր խմբաքանակ է եղել: Այդ մասին, ինչպես տեղեկացնում է «Արմենպրես»-ը, հաղորդել է իտալական La Republica-ն, որի տրամադրության տակ հայտնվել է մաֆիայի բանակցությունների ձայնագրությունը:

«Նդրագենտա» խմբավորման պարագլուխները բանակցությունների ձայնագրության մեջ քննարկում են զբոսանավի խորտակումը և թմրանյութերի այն խմբաքանակը, որը գտնվում էր նավի վրա: Ձայնագրությունն արվել է իտալական ֆինանսական ոստիկանության կողմից, որը թմրառևտրի դեմ պայքարի շրջանակներում կալանավորել է «նդրագենտայի» 20 անդամի:

Հետաքննությունը կապված է Հարավային Ամերիկայից մեծ խմբաքանակներով կոկաինի մատակարարումների հետ, որոնք, ինչպես ենթադրում է հետաքննությունը, սննդամթերքի տեսքով զբոսանավեր էին բեռնվում Դոմինիկյան Հանրապետության Պերուի, Պանամայի և Ֆլորիդայի նավահանգիստներում: Հետաքննության վարկածով, զբոսանավի անձնակազմի անդամներն օգնում էին Costa Concordia անցկացնել քրեական բեռը: Ընդսմին նավի խորտակումից հետո այն այդպես էլ չհայտնաբերվեց:

Ինչպես պնդում է La Republica-ն, թմրանյութերի մաքսանենգության համար մաֆիան, բացի Costa Crociere ընկերության նավերից, որին պատկանում էր Costa Concordia-ն, օգտագործել է նաև Norwegian Cruise Lines և MSC Cruises ընկերությունների զբոսանավերը, որոնք նավարկում են Եվրոպայի, Հյուսիսային Ամերիկայի և Կարիբյան ավազանի երկրների միջև:

Costa Concordia-ն խորտակվել է 2012 թվականի լույս հունվարի 14-ի գիշերը, երբ նավը խութերի բախվեց՝ չափից ավելի մոտենալով Ջիլիո կղզու ափին: Նավի վրա եղել են շուրջ 4,2 հազար ուղևորներ և անձնակազմի անդամներ: Աղետի հետևանքով զոհվել է 32 մարդ:

2014 թվականի հուլիսին նավը քարշակվել է Ջենովայի նավահանգիստ և այժմ օգտահանման գործընթացում է: Costa Concordia-ի խորտակման հետևանքով վերջին զոհվածի մնացորդները հայտնաբերվել են անցյալ տարվա նոյեմբերին:

2015 թվականի փետրվարին Իտալիայի Գրոսետո քաղաքի առաջին ատյանի դատարանը Costa Concordia-ի հրամանատար Ֆրանչեսկո Սկետինոյին մեղավոր է ճանաչել նավի խորտակման մեջ և նրան դատապարտել է 16 տարվա ազատազրկման: