A320-ի երկրորդ օդաչուն բժիշկներին սուտ տեղեկություն է տվել իր աշխատանքային գործունեության մասին. Bild

Համաշխարհային Մամուլ 2 Ապրիլ, 2015 14:41

Ֆրանսիական Ալպերում A320-ի կործանման ենթադրյալ մեղավորը՝ գերմանացի օդաչու Անդրեաս Լուբիցը, բժիշկներին ոչ հավաստի տեղեկություններ է ներկայացրել իր աշխատանքային գործունեության մասին: Ինչպես ապրիլի 2-ին հաղորդել է Bild թերթը, աղետից քիչ առաջ անցած բուժզննման ընթացքում նա բժիշկներին ասել է, թե հիվանդության պատճառով արդեն արձակուրդի մեջ է և առաջիկայում չի կատարելու իր մասնագիտական պարտականությունները, տեղեկացնում է «Արմենպրես»-ը:

Վկայակոչելով քննիչների նյութերը՝ հրատարակությունը նշում է, որ Լյուբիցը վերջին անգամ Դյուսելդորֆի կլինիկայում է եղել մարտի 10-ին, այսինքն՝ ողբերգությունից երկու երկու շաբաթ առաջ: Հանրանավի կործանման ենթադրյալ մեղավորը գանգատվել է տեսողության հետ կապված խնդիրներից: Նա չի թաքցրել, որ իր գործատուն Germanwings ավիաընկերությունն է, բայց դրա հետ մեկտեղ վստահեցրել է, որ առողջական վիճակի պատճառով ժամանակավորապես ազատվել է աշխատանքից:

Germanwings ավիաընկերության A320 ինքնաթիռը, որը Բարսելոնից ուղևորվում էր Դյուսելդորֆ, կործանվել է մարտի 24-ին Ֆրանսիայի հարավ-արևելքում՝ Ալպերի դժվարամատչելի շրջանում: Աղետի հետևանքով զոհվել է 150 մարդ: Միակ հայտնաբերված «սև արկղի» ձայնագրությունը ցույց է տալիս, որ աղետը դարձել է երկրորդ օդաչուի՝ Գերմանիայի քաղաքացի Լյուբիցի դիտավորյալ գործողությունների հետևանքը:

Գերմանիայի ԱԳ նախարարությունը հրապարակել է Ֆրանսիայում կործանված A320 ինքնաթիռում գտնվող ուղևորների և անձնակազմի անդամների ճշտված ցուցակը: ԱԳՆ-ի տվյալներով՝ ավիաաղետի զոհ են դարձել ԳՖՀ-ի 72 քաղաքացիներ, 47 իսպանացիներ, Արգենտինայի, ԱՄՆ-ի և Ղազախստանի երեքական քաղաքացիներ, երկուական ավստրալացիներ, բրիտանացիներ, իրանցիներ, կոլումբիացիներ, ճապոնացիներ, Բելգիայի, Դանիայի, Կոտ դ՛Իվուարի, Մեքսիկայի, Մարոկոյի, Նիդեռլանդների և Վենեսուելայի մեկական քաղաքացիներ:

Այդ մարդիկ ունեին միայն մեկ երկրի քաղաքացիություն: Բացի այդ, զոհված հինգ ուղևորներ ունեին կրկնակի քաղաքացիություն. չորս իսպանացիներ ունեին նաև Իսրայելի, Մարոկոյի, Մեծ Բրիտանիայի և Մեքսիկայի անձնագրեր, իսկ ուղևորներից մեկն ուներ Չիլիի և Վենեսուելայի քաղաքացիություն, հաղորդել Է ՏԱՍՍ-ը: