Էրդողանն «ամբարտավան և մեծամոլ» է. իտալական մամուլ

Իտալական մամուլը խստորեն քննադատել է Թուրքիայի նախագահ Ռեջեփ Թայիփ Էրդողանին և նշել, որ նրա ու վարչապետ Ահմեդ Դավութօղլուի միջև բախում է ունենում:

Ինչպես հաղորդում է «Արմենպրես»-ը, մասնավորապես, իտալական Corriere della Sera թերթն իր' «Թուրքիա. նախագահ Էրդողանի քաղաքական ճգնաժամի ազդանշանը բռնությունն է» վերտառությամբ հոդվածում Էրդողանին «ամբարտավան և մեծամոլ» է անվանել' նշելով, որ այդ «որակների» պատճառով նրա ու Դավութօղլուի միջև առկա լարվածությունը հասել է բախման:

Թերթը Թուրքիայում, առանձնապես այդ երկրի գլխավոր քաղաք Ստամբուլում բռնությունների օրական աճը պայմանավորել է երկրի ներսում առկա ծանր սոցիալական ճգնաժամով:

«Թուրքիայում քաղաքական ճգնաժամը խորացրել է նախագահ Էրդողանի ամբարտավան և ծայրահեղ մեծամոլ պահվածքը: Էրդողանի այդ պահվածքը բողոքի պատճառ է դարձել նաև իշխող «Արդարություն և զարգացում» կուսակցության մեջ»,- նշել է թերթը:

Թուրքիայում քրդական խնդրի լուծման հետ կապված Էրդողանի կողմից կառավարությանը քննադատելուց հետո Էրդողանի և Դավութօղլուի միջև առկա լարվածությունը գնալով ավելի մեծանալու մասին ավելի վաղ գրել էր նաև բրիտանական հեղինակավոր Financial Times թերթը:

Թերթը գրել էր, որ Էրդողանի և Դավութօղլուի միջև լարվածությունն արդեն վերածվել է «ներքին վիճաբանության» ԱԶԿ-ում:

Հարցի առնչությամբ թերթը հղում էր կատարել թուրք լրագրող Ահմեդ Հաքանի հետևյալ կարծիքին. «Էրդողանի և Դավութօղլուի միջև իշխանության համար պայքար է գնում: Էրդողանն ամեն ինչի վրա «վերահսկողություն» է ցանկանում, իսկ Դավութօղլուն էլ հակադարձում է, որ վարչապետն ինքն է և ցանկանում է օգտագործել իր ուժը»:

Թերթը մեջ է բերել նաև անունը հրապարակել չցանկացած ԱԶԿ պաշտոնյայի հետևյալ խոսքը. «Վարչապետի պաշտոնը ստանձնելիս Դավութօղլուն համոզված էր, որ իր գլխավոր գործը պետք է լինի երկրի համար նոր սահմանադրության և համակարգի ստեղծումը: Սակայն, ներկայում վարչապետի և նախագահի միջև վստահության թելերը խախտվել են, և դրա արդյունքը կարող է դառնալ այն, որ Էրդողանը Դավութօղլուին թույլ չտա վերահսկել նոր խորհրդարանում ԱԶԿ-ի նախատեսած ցուցակը»:

Թերթը նշում է, որ Էրդողանի և Դավութօղլուի միջև լարվածությունն ավելի է խորացրել փոխվարչապետ Բյուլենթ Արինչի կողմից Էրդողանի հասցեին արած քննադատությունն առ այն, որ վերջինս հայտարարել էր, թե «Թուրքիայում քրդական հարց գոյություն չունի», ինչը ցնցում էր առաջացրել ԱԶԿ-ում: Բ. Արինչը նկատել էր տվել, որ «նախագահը միջամտում է կառավարության գործերին», ինչը հակասում է Թուրքիայի գործող սահմանադրությամբ նախագահին վերագրված լիազորությունների շրջանակին:

Նշենք, որ Էրդողանը չի թաքցնում, որ իր նպատակը Թուրքիան խորհրդարանականից նախագահական համակարգի տանելն է, ինչն իրեն միանձնյա իշխանության հնարավորություն կընձեռնի: