Ալիևի հակաիրանական այցը Սաուդյան Արաբիա. «Ազադլըգ»
Համաշխարհային Մամուլ
Ադրբեջանի նախագահ Իլհամ Ալիևի' ընտանյոք հանդերձ անակնկալ այցը Սաուդյան Արաբիայի թագավորություն, որի մասին նախապես չի հաղորդվել և ներկայացվել է որպես պաշտոնական այց, միանշանակ չի գնահատվել Ադրբեջանում:
Ինչպես հաղորդում է «Արմենպրես»-ը, «Ազադլըգ» թերթը Ալիևի Էր Ռիադ այցի մեջ երկու նպատակ է նկատում' տնտեսական և քաղաքական: Նշելով, որ Պարսից ծոցի պետությունների մասնակցությամբ Սաուդյան Արաբիան սունիական ռազմական դաշինք է ստեղծել Թեհրանի աջակցությամբ Եմենում շիա ապստամբ հուսիների նորաստեղծ կառավարությունը վերացնելու և այդ երկրում կրկին սունիական իշխանությունը վերակագնելու համար, որին աջակցում է նաև Թուրքիան, թերթը գրում է, որ Ալիևը շտապել է միանալ այդ հակաիրանական դաշինքին: Ներկայումս մարդու իրավունքների խախտումներով և մեծ թվով քաղբանտարկյալներով պայմանավորված' Արևմուտքի հետ լարված հարաբերություններ ունեցող Ադրբեջանը փորձում է ԱՄՆ-ի հետ հարաբերությունները կարգավորել Սաուդյան Արաբիայի միջոցով:
Ալիևի այցի հետ կապված սաուդարաբացի հետազոտող Մուհամեդ ալ Սալյամին «Ալ Արաբիա» հեռուստաալիքի հետ զրույցում մեկնաբանել է, որ Էր Ռիադի նպատակը, Իրանի հետ սահմանակից Կենտրոնական Ասիայի հանրապետությունների հետ տնտեսական, քաղաքական և մշակութային կապերը ամրապնդելու ճանապարհով, վերջիններիս հարկադրելն է վերանայել տարածաշրջանում Թեհրանի քաղաքական դիրքորոշման նկատմամբ ունեցած իրենց տեսակետը: Սաուդարաբացի փորձագետն ուշադրություն է հրավիրել այն հանգամանքի վրա, որ Ալիևը Էր Ռիադ է այցելել Սաուդյան Արաբիայի համար չափազանց կարևոր ա շխարհաքաղաքական գործընթացների ֆոնին, երբ ԱՄՆ-ի և Թեհրանի հարաբերությունները կարգավորվելու հետ կապված Մերձավոր Արևելքում առաջատարի դերակատարություն ստանձնելու համար պայքար է ընթանում:
Չնայած այն բանին, որ Իրանը կարող է բավականին մեծ տնտեսական հետաքրքրություն ներկայացնել, պատմական տարաձայնությունների պատճառով Բաքուն չի վստահում Թեհրանին: Ադրբեջանը գիտի, որ ուժեղ Իրանն իր տնտեսական հզորությամբ կարող է կշեռքի նժարը Կասպից ծովում թեքել իր կողմը և չի ցանկանում, որ Թեհրանը գերիշխի տարածաշրջանում: Ներդրումային կապերի և մշակութային ժառանգության միջոցով Իրանն արդեն ամրապնդվել է Տաջիկստանում, և այդ փաստն Ադրբեջանին ստիպում է այս բարդ աշխարհաքաղաքական պահին շրջվել Թեհրանի հակառակորդի' Էր Ռիադի կողմը:
Ալիևն Էր Ռիադում հանդիպել է Սաուդյան Արաբիայի ֆինանսների նախարար Իբրահիմ ալ Ասաֆի և նավթի ու բնական պաշարների նախարար Ալի ալ Նուայմի հետ, ինչը թերթին թույլ է տվել ենթադրել, որ մանաթի և նավթի հետ էժանացման առաջ կանգնած Բաքուն խնդրել է ներդրումներ կատարել Ադրբեջանում:
Արևմուտքի և հարևանների հետ հարաբերությունները փչացրած Ալիևի Սաուդյան Արաբիա այցը թերթը հիմնավորում է նաև հետևյալ հանգամանքով:
«Մոտ 30 տարի առաջ Իլհամ Ալիևի հայրը' «ադրբեջանական ժողովրդի հայր» Հեյդար Ալիևը Սաուդյան Արաբիան տեսնում էր որպես մոդել և գործընկեր ապագա ադրբեջանական պետության համար: Հարկ է նշել, որ Հեյդար Ալիևը Սաուդյան Արաբիան և Պարսից ծովի այլ արաբական պետությունները դիտարկում էր ոչ միայն որպես ցեղային և կլանային քաղաքական համակարգերի հիման վրա կառավարման մոդել, այլ նաև որպես այլընտրանք Ռուսաստանին»,- գրում է թերթը:
Արաբական ԶԼՄ-ները հայտնել են, որ Ալիևը, որը Սաուդյան Արաբիա էր այցելել կնոջ, որդու, դստեր և փեսայի հետ, Էր Ռիադից մեկնել է ուխտագնացության Մեքքա:
ՈՒՂԻՂ ԵԹԵՐ
Ամենադիտված 
Դիրքում բռնшբшրnւթյшն դեպքը տեսած, ապա սպшնված 3 զինվորների ծնողներն արդարադատություն են պահանջում (տեսանյութ)
