Դամասկոսի հրապարակներից մեկի անվանակոչումից մինչև գիտաժողով. միջոցառումներ Սիրիայում

Ի հեճուկս ծանր պատերազմական իրավիճակի' Սիրիայի մայրաքաղաք Դամասկոսում Հայոց ցեղասպանության ոգեկոչման մի շարք միջոցառումներ կանցկացվեն:

«Արմենպրես»-ի հետ զրույցում Դամասկոսի հայոց թեմի առաջնորդ Տեր Արմաշ եպիսկոպոս Նալբանդյանը տեղեկացրեց, որ, համայնքային միջոցառումներից զատ, աշխատանքներ են տարվում պետական մակարդակով հարցը բարձրացնելու ու ճանաչման հասնելու ուղղությամբ: «Ես կարող եմ խոսել Դամասկոսի աշխատանքների մասին: Ստեղծվել է Հայոց ցեղասպանության 100-րդ տարելիցի ոգեկոչման սիրիահայության կենտրոնական մարմինը, որը սերտորեն համագործակցում է 100-ամյակի կենտրոնական մարմնի հետ: Նախ ասեմ, որ հունվարի 6-ին կատարեցինք ոգեկոչման արարողությունների մեկնարկը, մենք դիմումներ են ներկայացրել ու հսկայական աշխատանք տարել Հայոց ցեղասպանության պետական և քաղաքական ճանաչման առումով: Արդեն որոշ լսումների ենք մասնակցել Սիրիայի խորհրդարանում, դրա արդյունքը եղավ այն, որ մարտի 17-ին Սիրիայի խորհրդարանը մեկ րոպե լռությամբ հարգեց Հայոց ցեղասպանության նահատակների հիշատակը և հայտարարությամբ հանդես եկավ: Աշխատանքներ են տարվում, որ նույն կերպ պետական բարձր մակարդակով ընդունելության արժանանա Հայոց ցեղասպանությունը, և ապահովվի դրա դատապարտումը' հույս ունենալով, որ այդ ձևով կիրականանա սիրիական կրթական ծրագրերում Հայոց ցեղասպանության դասավանդումը: Եթե դատապարտվի ու նոր սերունդը իմանա այդ ոճրի մասին, չեն կրկնվի այսպիսի ողբերգություններ և ոչ մարդկային սպանություններ»,- ասաց Արմաշ Սրբազանը:

Դամասկոսի հայոց թեմի առաջնորդի տեղեկացմամբ' արդեն առկա է Սիրիայի մայրաքաղաքի քաղաքապետարանի թույլտվությունը, որպեսզի հայոց առաջնորդարանի կողքը գտնվող հրապարակն անվանակոչվի Սրբոց նահատակաց հրապարակ: «Ապրիլի 26-ին, երբ նահատակների սրբադասումով զինված պետք է վերադառնանք Դամասկոս, պետք է կատարվի այդ հրապարակի անվանման հռչակումը, ինչպես նաև տեղադրվելիք հուշաքարի հիմնարկեքի արարողությունը»,-տեղեկացրեց Տեր Արմաշ եպիսկոպոս Նալբանդյանը:

Բացի այդ, ամռանը' ուսումնական տարվա ավարտին, Դամասկոսի պետական համալսարանում կկազմակերպվի «Հայոց ցեղասպանությունը և արաբական ժողովրդի դերը ցեղասպանված հայերի փրկության գործում» խորագրով գիտաժողովը: «Հոկտեմբերի ավարտին ծրագրում ենք կազմակերպել Կոմիտասին նվիրված «Նահատակ հանճարը» վերնագրով երաժշտական երեկո՝ ներկայացնելով նրա հսկայական տաղանդն ու արվեստը»,- նշեց Արմաշ Սրբազանը:

Նրա խոսքով' այս ամենին զուգահեռ կանցկացվեն նաև համայնքային ու եկեղեցական միջոցառումներ' ցուցահանդեսներ, դասախոսություններ, քայլարշավներ և ծեսեր: