Երևանը Եվրոպայի 16 հնագույն քաղաքներից մեկն է. The Telegraph-ի անդրադարձը

Բրիտանական The Telegraph պարբերականը կազմել է Եվրոպայի 16 ամենահին քաղաքների ցանկը, որտեղ ներառված է նաև Հայաստանի մայրաքաղաք Երևանը: «Արմենպրես»-ի փոխանցմամբ՝ հոդվածագիրը շեշտում է, որ աշխարհի բազմաթիվ հնագույն քաղաքներ, որոնք գտնվում են Մերձավոր Արևելքում, ներկա դրությամբ անհասանելի են զբոսաշրջիկների համար, մինչդեռ Եվրոպայի բազմաթիվ հին քաղաքներ ոչ միայն գրավիչ են, այլև բաց հյուրերի համար:

Խոսելով Երևանի մասին՝ հոդվածագիրը նախ շեշտում է, որ այն կառուցվել է մ.թ.ա 782 թվականին՝ Հռոմից ավելի քան 30 տարի առաջ: «Քաղաքը, որ ներկա դրությամբ Հայաստանի մայրաքաղաքն է, դարեր շարունակ կարևոր կանգառ է հանդիսացել Ասիայից Եվրոպա ուղևորվող քարավանների համար: Երևանը զավթել են ասորիները, հռոմեացիները, բյուզանդացիները, պարսիկները, արաբները, սելջուկները, մոնղոլներն ու թուրքերը: ԽՍՀՄ փլուզումից հետո Հայաստանի մայրաքաղաքը մշակութային զարգացում է ապրում. այստեղ են գտնվում բազմաթիվ թանգարաններ, պատկերասրահներ: Թեպետ դանդաղ, սակայն զբոսաշրջությունը նույնպես զարգանում է: Բազմաթիվ տուրիստական օպերատորներ առաջարկում են էքսկուրսիաներ՝ տեսարժան վայրերով գիդերի ուղեկցությամբ»,- ասված է հոդվածում:

Եվրոպայի հնագույն քաղաքների ցանկում նշվում են Աթենքը, Զադարը, Մցխեթին, Կադիսը, Լիսաբոնը, Լառնական: