Հունաստանը պատրաստ է դեֆոլտ հայտարարել վարկատուների հետ համաձայնության չհասնելու դեպքում. Financial Times

Հունաստանի կառավարությունը պատրաստվում է պետական պարտքի դեֆոլտ հայտարարել, եթե չկարողանա մինչև ապրիլի վերջը համաձայնության հասնել միջազգային վարկատուների հետ: Այս մասին, ինչպես տեղեկացնում է «Արմենպրես»-ը, ապրիլի 13-ի երեկոյան իր ինտերնետ-կայքում հաղորդել է Financial Times թերթը:

«Կառավարությունը, որի մոտ արագորեն վերջանում է պետական ծառայողների աշխատավարձերի և կենսաթոշակների վճարման փողը, որոշել է հրաժարվել Արժույթի միջազգային հիմնադրամին 2,5 միլիարդ եվրոյի փոխանցումից, ինչը պետք է կատարվի մայիսին և հունիսին, եթե համաձայնություն ձեռք չբերվի»,- թերթին ասել են Հունաստանի իշխանությունների պլաններին իրազեկ աղբյուրներ:

«Մենք հասել ենք ճանապարհի վերջին: Եթե եվրոպացիները փող չփոխանցեն ֆինանսական օգնության հիմնադրամից, այլընտրանք չի լինի, բացի դեֆոլտից»,- հրատարակությանը հայտարարել է Հունաստանի կառավարության ներկայացուցիչը, որը չի ցանկացել հայտնել իր անունը, հաղորդել է ՏԱՍՍ-ը: