Լոլիկի ցանքատարածություններն այս տարի նախատեսվում է ավելացնել 2500 հա-ով

ՀՀ գյուղատնտեսության նախարար Սերգո Կարապետյանն ապրիլի 14-ին այցելել է Արարատի մարզի Դարակերտ համայնքում գործող ՀՀ ԳՆ «Բանջարաբոստանային և տեխնիկական մշակաբույսերի գիտական կենտրոն» ՊՈԱԿ' կենտրոնի ընթացիկ աշխատանքներին ծանոթանալու նպատակով: Ինչպես տեղեկացնում են ՀՀ գյուղատնտեսության նախարարության հասարակայնության հետ կապերի բաժնից, դրական գնահատելով հատկապես վերջին տարիներին կենտրոնի գործունեությունը' նախարարն ընդգծել է, որ բանջարաբոստանային և տեխնիկական մշակաբույսերի տեղական սորտերի մշակության ուղղությամբ տարվող աշխատանքները տարեցտարի ավելի բարեհաջող են ընթանում, ինչի շնորհիվ սերմնաբուծության ոլորտում տարեկան հաջողվում է ապահովել 30-40 տոկոս աճ:

«Մեզ համար գերակա խնդիր է մնում տեղական սերմնաբուծության արտադրության ծավալների ավելացման հաշվին ավելացնել բանջարաբոստանային մշակաբույսերի տեղական սորտերի տարածումը մեր հանրապետությունում»,- նշել է նախարարը' հավելելով, որ այդ ուղղությամբ կենտրոնը սերտորեն համագործակցում է նաև մասնավոր հատվածի հետ:

Նախարարը հայտնել է, որ ընթացիկ տարվա աշնանը կենտրոնում հոսքային գծերի տեղադրման և աշխատանքի մեքենայացման շնորհիվ հնարավոր կլինի առաջիկա տարիներին տեղական սորտերի սերմերի նկատմամբ առկա պահանջարկի մոտ 80 տոկոսն ամբողջությամբ բավարարել գիտական կենտրոնի արտադրության հաշվին:

Տեղեկացնելով, որ բանջարաբոստանային մշակաբույսերի թվում ներկայումս հանրապետությունում առավել մեծ պահանջարկ ունի հատկապես լոլիկը, Սերգո Կարապետյանը նշել է, որ այս տարի նախատեսվում է 2500 հեկտարով ավելացնել լոլիկի ցանքատարածությունները:

Իր հերթին գիտական կենտրոնի տնօրեն Գայանե Սարգսյանը նշել է, որ գյուղացիական տնտեսությունները մեծ հետաքրքրություն են ցուցաբերում տեղական սորտերի նկատմամբ, և համոզմունք է հայտնել, որ կենտրոնում արտադրվող սերմերն ամբողջությամբ կսպառվեն: Նա նշել է, որ այսօր գիտական կենտրոնն ունի բանջարաբոստանային և տեխնիկական մշակաբույսերի 3620-ից ավելի սորտեր, այդ թվում' 40-ից ավելի լոլիկի սորտեր, որոնցից առավել մեծ պահանջարկ ունեն, մասնավորապես, «Անահիտ», «Արա», «Նոյ», «Հայաստանի հրաշք», «Երազ» և «Մուսա լեռ» տեսակնե րը:

Սերմերի պահանջարկը և արտադրության ծավալները բավարարելու համար գիտական կենտրոնը համագործակցում է նաև մասնավոր տնտեսությունների հետ: Բացի սերմարտադրությունից, գիտական կենտրոնն արդեն երրորդ տարին է, ինչ սածիլներ է աճեցնում, որոնք հետագայում իրացվում են հանրապետության բոլոր մարզերում: