Վերամշակողները պատրաստ են մթերել գյուղմթերքի մեծ ծավալներ, իսկ գնի մասին չեն շտապում խոսել

Հայաստանի վերամշակող ընկերությունները մթերման գործընթացի հիմնական խնդիրը համարում են իրենց և գյուղացիների միջև գնի շուրջ անհամաձայնությունը: Իսկ մթերման ծավալների հետ կապված՝ նրանք վստահեցնում են, որ խնդիրներ չունեն և կարող են մթերել գյուղացու արտադրած ողջ բերքը:

Լրագրողների հետ հանդիպման ժամանակ Գյուղատնտեսության փոխնախարար Ռոբերտ Մակարյանը հայտնեց, որ նախարարության աշխատակիցները այցելել են վերամշակող բոլոր ընկերությունները և հավաստիացել, որ նրանք պատրաստ են գյուղմթերքի մթերմանը:

«Օրինակ, վերամշակողները կարող են լոլիկի անսահմանափակ մթերում կատարել, իսկ ինչ վերաբերում է խաղողին` վերամաշողները վստահեցնում են, որ խնդիրներ չեն լինի: Կազմակերպություններ կան, որ ունեն շրջանառու միջոցների խնդիրներ, և մենք փորձում ենք օգնել նրանց` լուծելու այդ հարցերը, որ խնդիրներ չլինեն մթերման սեզոնին: Ինչ վերաբերում է գնին՝ հիմա չենք կարող նշել, որովհետև դա կախված է տվյալ պահի առաջարկ-պահանջարկից»,- «Արմենպրես»-ի փոխանցմամբ` ասաց նա:

Հայաստանի պահածոների և հյութ արտադրողների միության նախագահ, «Արարատ» սննդի կոմբինատի գլխավոր տնօրեն Երվանդ Թարվերդյանն էլ հայտնեց, որ իրենք հիմնականում խնդիր են ունենում մթերման համար անհրաժեշտ գյուղմթերքի ծավալների հետ կապված: «Մենք պատրաստ ենք մթերել շատ մեծ ծավալներ: Խնդիր կա միայն բերքի հետ կապված և կազմակերպված մթերում իրականացնլու համար: Ցանկացած որակի բերք մթերվում է, որակի հետ կապված խնդիր չկա»,- ասաց նա:

Ասուլիսի ընթացքում լրագրողները օրինակ բերեցին Աղավնաձորը, որտեղ նախորդ տարի խնդիր էր առաջացել խաղողի մթերման հետ կապված:

Պռոշյանի կոնյակի գործարանի տնօրեն Արմեն Գասպարյանը նշեց, որ այդտեղ խնդիրը եղել է գնի հետ կապված: «Գյուղացիները մտածում են, թե իրենք ավելի լավ խաղող են մշակում և փորձում են ավելի բարձր գնով վաճառել: Արդյունքում նրանք չեն կարողանում ընդհանուր հայտարարի գալ մթերողներ հետ»,- հայտնեց նա` նշելով, որ մթերման հետ կապված խնդիր չի եղել: