Կուտակային կենսաթոշակային համակարգի 165 հազար մասնակից առաջին անգամ ստացել է իր հաշվի վերաբերյալ հաշվետվություն

Պարտադիր կուտակային կենսաթոշակային համակարգի մասնակիցներն առաջին անգամ ստացել են 2014 թվականի տարեկան հաշվետվությունը, որտեղ ներկայացվում է նրանց հաշվի վերաբերյալ ամբողջական տեղեկատվություն:

«Արմեպրես»-ի փոխանցմամբ' լրագրողների հետ հանդիպման ժամանակ Կենսաթոշակային համակարգի սպասարկման դեպարտամենտի ղեկավար Տիգրան Պետրոսյանը հայտնեց, որ հաշվետվություները իրենցից ներկայացնում են անձի կենսաթոշակային ֆոնդում կատարված փոփոխությունների վերաբերյալ ողջ տեղեկատվությունը:

«Այնտեղ ներառված է տեղեկատվություն կուտակային հատուցումների չափի, ձեռք բերված փայերի քանակին և գործարքներին, ֆոնդային փայերի հաշվարկային արժեքի և ֆոնդի այլ բաղադրիչների հետ կապված: Համակարգի մասնակիցներն առաջին անգամ են ստանում թղթային ձևով հաշվետվություն, իսկ հետագա տարիներին հաշվետվությունը ստանալու համար մասնակիցը պետք է ներկայացնի համապատասխան դիմում կենսաթոշակային հաշվի օպերատորին»,- ասաց նա:

Հայաստանի կենտրոնական դեպոզիտարիայի տնօրեն Վահան Ստեփանյանն էլ հայտնեց, որ այս տարի հաշվետվություններ են ուղարկվել 165 հազար անձանց: Նրա խոսքով' հաշվետվություններ են ստացել նաև նրանք, ովքեր հրաժարվել են համակարգի մասնակցի իրենց կարգավիճակից, սակայն ունեն կատարած վճարումներ: Ստեփանյանը նաև խոսեց կենսաթոշակային համակարգի մասնակիցների ֆոնդերի և դրանցում առկա միջոցների երաշխիքների մասին: «Կառավարիչների գույքն օրենքով առանձնացված է համակարգի մասնակիցների գույքից, հետևաբար, եթե նույնիսկ ֆոնդի կառավարիչը սնանկ ճանաչվի, ապա դա չի ազդի բնակիչների միջոցների վրա: Դրանք պարզապես մի կառավարչից կփոխանցվեն մյուսին»,- ասաց Ստեփանյանը:

2014 թվականի հունվարի 1-ից Հայաստանում ներդրվել է պարտադիր կուտակային կենսաթոշակային համակարգ, սակայն «Կուտակային կենսաթոշակների մասին» օրենքի մի շարք դրույթներ նույն տարվա ապրիլի 2-ի ՍԴ որոշմամբ ճանաչվեցին Սահմանադրությանը հակասող: Ներկայումս համակարգը գործում է միայն պետական համակարգում աշխատող անձանց համար, իսկ մասնավոր հատվածում համակարգի գործարկումը նախատեսված է 2017 թվականին: