Անկարան այլևս վստահելի չի երևում. անգլիական մամուլ

Չորս տարի առաջ թվում էր, թե Մերձավոր Արևելքում Թուրքիան անվտանգության հիմնաքար է հանդիսանում: Նա հանդես էր գալիս որպես ՆԱՏՕ-ի համատարիմ դաշնակից' քաղաքական իսլամի վրա հենված' պրագմատիկ կառավարությամբ Եվրամիությանն անդամակցության թեկնածու երկիր: Նախկինում վարչապետ, այժմ նախագահ Ռեջեփ Թայիփ Էրդողանն էլ տարածաշրջանում Արևմուտքի վստահելի անուն էր…Այժմ այս բոլորը երևում են որպես վաղ անցյալ:

Այս մասին, ինչպես հաղորդում է «Արմենպրես»-ը, գրում է անգլիական տնտեսական շրջանակների The Financial Times թերթի միջազգային հարաբերությունների բաժնի խմբագիր Դևիդ Գարդներն իր' «Անկարան այլևս վստահելի չի երևում» հոդվածում:

Գարդները նշում է, որ Թուրքիայի նախկին արտգործնախարար, ներկայիս վարչապետ Ահմեդ Դավութօղլուն այն ժամանակ իր գործունեությունն սկսել էր «զրո խնդիր հարևանների հետ» կարգախոսով, սակայն, այժմ Թուրքիան այլևս որևէ հարևան չունի, որի հետ խնդիր չունենա:

«Թուրքիայի հարևաններ Իսրայելը, Իրաքը, Եգիպտոսը, Սիրիան, Սաուդյան Արաբիան և Իրանը, որոնք նախկինում լավ հարաբերությունների մեջ էին այդ երկրի հետ, այժմ խիստ կասկածանքով են նայում Անկարային: Դրա պատաճռն այն է, որ Թուրքիան թույլ տվեց իր տարածքով Սիրիա մեկնել ջիհադականներին, որոնք այնտեղ միացան կառավարական ուժերի դեմ կռվող «Իսլամական պետություն» ահաբեկչական խմբավորմանը: Թուրքիան վերածվեց Իրաքի և Սիրիայի ջիհադականների անցման կետի: Եթե Անկարան դա չցանկանար, Սիրիայում և Իրաքում դիմակայություն չէր լինի»,- գրում է Գարդները և հ ավելում, որ Ռուսաստանի և Չինաստանի հետ իր մերձեցման քայլերով Անկարան կորցրել է նաև Արևմուտքի վստահությունը:

Գարդները համոզմունք է հայտնում, որ Էրդողանը Թուրքիային հեռացրել է նաև ԵՄ անդամակցությունից: «Իր ավտորիտար դիրքորոշմամբ, ոչ ազատական ժողովրդավարությամբ, օրենքի գերակայության ստորադասմամբ, արտահայտվելու և հավաքներ անցկացնելու իրավունքի սահմանափակումներով Էրդողանը Թուրքիային շատ է հեռացրել ԵՄ անդամակցության հնարավորությունից և կանգնել մեկուսանալու շեմին»,- հավելել է հոդվածագիրը: