Polymetal-ը Հայաստանում 3,5 մլն դոլարով գնել է Լիճքվազի ակտիվի 25 տոկոսը

Տնտեսություն 15 Ապրիլ, 2015 17:30

Ռուսաստանում արծաթի խոշորագույն արտադրող և ոսկու առաջատար արդյունահանողներից մեկը՝ Polymetal-ը, Հայաստանում ձեռք է բերել Լիճքվազի ակտիվի 25 տոկոսը և համաձայնեցրել է իր բաժինը մինչև 50 տոկոս ավելացնելու կարգը: Այդ մասին, ինչպես տեղեկացնում է «Արմենպրես»-ը, հաղորդել է «Ինտերֆաքս»-ը՝ հղում անելով ընկերությանը:

25 տոկոսի գնումը կատարվել է Polymetal-ի՝ 3,5 միլիոն դոլար գումարի բաժնետոմսերի դիմաց: Ընկերությունը նաև ստանձնել է հանքավայրի երկրաբանական-հետախուզական աշխատանքների, տեխնոլոգիական հետազոտությունների ֆինանսավորման և սույն աշխատանքների ավարտից հետո ընկերությունում բաժինը մինչև 50 տոկոս ավելացման իրավունքի դիմաց JORC-ին համապատասխան պաշարների գնահատման հաշվետվության պատրաստման պարտավորություններ:

Polymetal-ի կարծիքով՝ Լիճքվազի հանքավայրն ունի երկրաբանական հետախուզության մեծ ներուժ: Պատմական գնահատման համաձայն՝ ենթադրյալ պաշարները կազմում են 2,4 միլիոն տոննա հանքանյութ՝ 6,9 գ/տ պարունակությամբ, ինչը համապատասխանում է 0,6 միլիոն ունցիա ոսկու համարժեքին: Հանքավայրը գտնվում է Հայաստանի Մեղրու շրջանում (Սյունիքի մարզ)՝ Երևանից 380 կիլոմետր հարավ ընկած շրջանում: Դա զարգացած ենթակառուցվածքով (էլեկտրականություն, ջուր, բնակարան) և որակյալ աշխատուժ ունեցող տարածաշրջան է:

«Ես ուրախ եմ հաղորդելու Լիճքվազում բաժին ձեռք բերելու որոշման, Հայաստանում մեր առաջին ակտիվի մասին,- հայտարարել է Polymetal-ի գլխավոր տնօրեն Վիտալի Նեսիսը:- Հուսով եմ, որ այս մեծ նախագիծն ավելի կմեծանա երկրաբանական հետախուզության արդյունքում և օպտիմալ հենակետ կստեղծի նոր տարածաշրջանում մեր հետագա զարգացման համար»:

Այժմ Polymetal-ն ակտիվներ ունի ՌԴ-ում (Մագադանի և Սվերդլովսկի մարզերում, Խաբարովսկի երկրամասում, Չուկոտկայում և Ղազախստանում: