Անկարայում խուճապ է. Թուրքիան Եվրոպայում տանուլ է տվել «ցեղասպանության պայքարը». «Ռադիկալ»

Հայոց ցեղասպանության 100-ամյա տարելիցին մի քանի օր մնացած՝ Անկարան հայտնվել է խուճապում, քանի որ Թուրքիան Եվրոպայում տանուլ է տվել «ցեղասպանության պայքարը»:

Ինչպես հաղորդում է «Արմենպրես»-ը, նման համոզմունք է հայտնել թուրքական «Ռադիկալ» թերթի վերլուծաբան Սերքան Դեմիրթաշը' թերթում հրապարակած հոդվածում՝ վերլուծելով Հայոց ցեղասպանության միջազգային ճանաչման ակտիվացած գործընթացի պատճառով Անկարայում առաջացած իրարանցումը:

Նրա խոսքով՝ թեև Անկարան փորձում է զգալ չտալ, սակայն, ակնհայտ է, որ խիստ անհանգստացած է Հայոց ցեղասպանության ճանաչման և Թուրքիային դատապարտող' միմյանց հաջորդող բանաձևերի ընդունմամբ:

Անդրադառնալով Թուրքիայի վարչապետ Ահմեթ Դավութօղլուի երեկ հրապարակած ցավակցական ուղերձին՝ Ս.Դեմիրթաշն ընդգծել է, որ նրա հայտարարությունն, ըստ էության, Թուրքիայի նախկին վարչապետ, այժմյան նախագահ Թայիփ Էրդողանի անցյալ տարվա ուղերձից տարբերվում է այն բանով, որ արվել է ոչ թե ապրիլի 24-ին, այլ չորս օր առաջ:

Նշելով, որ Թուրքիայի ղեկավարությունը խիստ անհանգստացած է այն բանով, որ, հնարավոր է՝ Գերմանիան ևս ճանաչի Հայոց ցեղասպանությունն ապրիլի 24-ին Բունդեսթագ այդ մասին ներկայացված բանաձևով և միանա Ցեղասպանությունը ճանաչած եվրոպական և մյուս երկրներին, թուրք մեկնաբանը նշել է. «Կարելի է ասել, որ Թուրքիան Եվրոպայում արդեն տանուլ է տվել «ցեղասպանության պայքարը», ինչը բացասական ազդեցություն կունենա Թուրքիայի' Եվրամիությանն անդամակցության գործընթացի վրա»: