Եթե ցեղասպանություն չլիներ, ապա Թուրքիայում կլիներ մի շատ հայտնի երգիչ՝ ես. Ազնավուրի հարցազրույցը՝ LifeNews-ին

Աշխարհահռչակ ֆրանսահայ շանսոնյե Շառլ Ազնավուրն այժմ Մոսկվայում է, որտեղ այսօր կայանալու է նրա համերգը: Մայիսի 4-ին նա կներկայացնի իր նոր ալբոմը, որը նվիրել է իր դժվարին անցյալին՝ ֆաշիզմի թեմային, պատերազմին և հայ ժողովրդի անցյալին, որը ցեղասպանություն է վերապրել:

LifeNews-ին տված բացառիկ հարցազրույցում երգիչը պատմել է իր երգերի հանրաճանաչության մասին, շոշափել հայ ժողովրդի ճակատագրի թեման և բացահայտել իր առողջության գաղտնիքը:

«Հայերը երբեք առանձնապես չեն ընդարձակվել այդ թեմայով: Կարծես, նրանք ամաչում էին, թեև ամոթալի պետք է լիներ ոչ թե իրենց համար, այլ նրանց, ովքեր դա արել են: Սակայն պետք է նշել, որ այժմ Թուրքիայում կան մարդիկ, ովքեր ընդունում են այդ փաստը: Անհրաժեշտ է հասկանալ, որ երբ ես խոսում եմ Ցեղասպանության մասին, ես խոսում եմ այն մասին, որ դա չի ճանաչվում պաշտոնական մակարդակով: Եվ ես ցանկանում եմ ասել նաև, որ եթե ցեղասպանություն չլիներ, ապա Թուրքիայում կլիներ մի շատ հայտնի երգիչ՝ ես: Նրանք կորցրին հայ մտավորականությանը, սակայն չհաջողվեց ոչնչացնել նրանց: Մենք կարողացանք ողջ մնալ, սակայն նրանք կորցրին այնպիսի մեծ մարդկանց անուններ, ովքեր փախան այնտեղից և ովքեր կարող էին լինել այդ երկրի մի մասը: Այդ ամենն այժմ անցյալում է, մենք հիմա 21-րդ դարում ենք, և եկել է այլ կերպ դիտարկելու ժամանակը: Մեր երկու ժողովուրդների միջև շատ ընդհանրություններ կան, և ժամանակն է ընդունել այն, ինչ եղել է մեր միջև, հաղթահարել այդ պատնեշը և շարժվել առաջ»,- ասել է Ազնավուրը:

Այժմ աշխարհահռչակ երգիչը 90 տարեկան է: Իր տարիքի մասին նա խոսում է այնպես, ինչպես ասում են ֆրանսիացիները. «Ես չեմ ծերացել, պարզապես ավելացել է իմ տարիքը», ընդ որում՝ նա չգիտի հավերժ երիտասարդության գաղտնիքը, սակայն պարզել է առողջության գաղտնիքը:

«Ես բացահայտել եմ առողջության գաղտնիքը, սակայն չեմ բացահայտել երիտասարդության գաղտնիքը, դա մինչ օրս բացահայտված չէ, ցավոք: Պետք է չափազանց շատ հիմարություններ անել, չի կարելի շատ խմել, գինին խմել հաճույքով և ընդամենը մեկ գավաթ: Ես երբեք չեմ ուտում ուտեստն ամբողջությամբ, ուտում եմ միայն կեսը, ոչ մի տեղ չեմ գնում ուշ երեկոյան, դուք ինձ չեք կարող տեսնել գիշերային ակումբում: Եվ ես 47 տարի առաջ թողել եմ ծխելը»,- պատմել է Ազնավուրը: