Ազնավուրի երկրպագուհին՝ «Լիդա տատիկը», զարմացել է, որ «նման մեծ մարդը» կարող է այդքան համեստ լինել

Շառլ Ազնավուրի ստեղծագործության երկրպագուհի, ռուս թոշակառու «Լիդա տատիկը» նրա մոսկովյան համերգից հետո, հանդիպելով իր կուռքի հետ, զարմացել է, որ «նման մեծ մարդը շատ համեստ է»: Այդ մասին, ինչպես տեղեկացնում է «Արմենպրես»-ը, ՌԻԱ Նովոստիին պատմել է Ռուսաստանում աշխարհահռչակ շանսոնիեի ներկայացուցիչ Քրիստինա Սարգսյանը:

Շառլ Ազնավուրի ելույթն ապրիլի 22-ին տեղի է ունեցել Մոսկվայի «Կրոկուս Սիթի Հոլլում»:

«Լիդա տատիկը», ինչպես ինքն է ներկայացել, մաեստրոյի հետ կուլիսներում հանդիպել է համերգից հետո: Նա երջանիկ էր, որ հանդիպել է իր կուռքին, զարմանալով, որ այդ հանդիպումը տեղի ունեցավ «հասարակ տատիկի» կյանքում, պատմել է Սարգսյանը:

Շանսոնիեի ներկայացուցչի խոսքով՝ կինը շփվել է մաեստրոյի հետ և զարմացած էր, որ «Ազնավուրի պես մեծ մարդը շատ համեստ է»: «Բայց, ինչպես հայտնի է, իսկապես մեծ մարդիկ հենց այդպիսին են լինում»,- հավելել է նա:

Լիդիա Իվանովնան հայտնի է դարձել մարտին այն բանից հետո, երբ «Կոմերսանտ»-ի լրագրող Ալեքսանդր Չեռնիխը հրապարակեց տեսագրություն, որտեղ նա կատարում է Ազնավուրի երգերը: Չեռնիխը տատիկին պատահաբար հանդիպել էր մետրոյում՝ ազդագրի մոտ: Լիդիան նրան պատմել է, թե կցանկանար ներկա լինել համերգին, բայց չգիտի՝ ինչպես դա անել: Տարեց կինը մի քանի տուն է երգել ֆրանսերենով, ինչը լրագրողը հասցրել է նկարահանել հեռախոսով: Ավելի ուշ նա և Եվգենի Չեռնիխը գտել են կնոջը: Շանսոնիեն իմացել է երկրպագուհու մասին և նրան տեսաուղերձով հրավիրել է իր համերգին: