Հայկական հարցում Իսրայելի դիրքորոշումը քարացած չէ. Le Figaro

Ֆրանսիական Le Figaro-ն լայնածավալ հոդված է հրապարակել Իսրայելի կողմից Հայոց ցեղսպանությունը ճանաչելու հարցի վերաբերյալ և նշել, որ հրեական պետությունը երկընտրանքի առջև է: Ֆրանսիական հեղինակավոր թերթն ընդգծում է, որ Իսրայելը երկար ժամանակ է, ինչ հրաժարվում է ճանաչել Հայոց ցեղասպանությունը և նշում, որ այդ երկիրը չպետք է բացակայեր Երևանում տեղի ունեցող հարյուրերորդ տարելիցի միջոցառումներից: «Հասարակական կարծիքի ճնշման արդյունքում Իսրայելը Երևան գործուղեց խորհրդարանական պատվիրակություն: «Սա արտացոլում է մեր համակրանքն ու համերաշխությունը հայ ժողովրդի նկատմամբ»,-«Արմենպրես»-ի հաղորդմամբ՝ Իսրայելի արտաքին գործերի նախարարության խոսնակ Էմանուել Ամինադաբիի խոսքերն է մեջբերել ֆրանսիական թերթը: Ամինադաբին ընդգծել է նաև, որ կարևոր չէ Իսրայելի դիրքորոշումը: «Մենք հիշելում ենք այդ ողբերգությունը»,- ըստ ֆրանսիական թերթի՝ ավելացրել է Իսրայելի ԱԳՆ խոսնակը:

Միաժամանակ, Le Figaro-ն ընդգծել է, որ մինչ Երևան ժամանելը, Իսրայելի խորհրդարանի պատգամավորներ Նահման Շաիին՝ Սիոնիստական միությունից, և «Լիքուդ»-ից Անաթ Բերկոյին իսրայելական դիվանագետները խնդրել են զգուշորեն արտահայտվել հայկական հարցի շուրջ, որպեսզի որևէ կերպ չվիրավորեն Թուրքիային և Ադրբեջանին:

«Սակայն այս պատգամավորների մասնակցությունը ոգեկոչման միջոցառումներին նշանակում է, որ Իսրայելի դիրքորոշումը քարացած չէ: Շաին ընդգծել է, որ Իսրայելը պետք է հասկանա և գիտակցի, որ տեղի է ունեցել ցեղասպանություն»,- գրել է Le Figaro-ն և ավելացրել, որ Շաին անձամբ խոսել է Հայկական հոլոքոստի մասին: «Որպես հրեա՝ մենք պատասխանատվություն ենք կրում այդ քայլն իրականացնելու հարցում: Մեր մասնակցությունը հարյուրերորդ տարելիցի միջոցառումներին արտացոլում է Քնեսեթի հանձնառությունը՝ պարբերաբար ոգեկոչելու հայ զոհերի հիշատակը և վերանայելու այս հարցը»,- գրել է ֆրանսիական թերթը՝ մեջբերելով Քնեսետի պատգամավոր Շաիի խոսքը: