Ինչու է Իսրայելը դեռևս հրաժարվում ճանաչել մեկդարյա ցեղասպանությունը. Times of Israel

Շատերը կոչ են անում կառավարությանը` փոխել դիրքորոշումը Թուրքիայի կողմից 1.5 մլն հայերի սպանության նկատմամբ, սակայն աշխարհաքաղաքական նկատառումները գերիշխում են: Times of Israel-ում հրապարակված իր հոդվածում գրում է Ռաֆայել Ահրենը:

Շատ դեպքերում երկրները չեն ցանկանում կոտորածները ճանաչել որպես ցեղասպանություն Թուրքիայի հետ կապերի վերաբերյալ ունեցած մտահոգության պատճառով: Թուրքիան ՆԱՏՕ-ի անդամ է և կարևոր մուսուլման դաշնակից արևմտյան շատ երկրների համար` գրում է հոդվածագիրը:

Իսրայելի շարունակական ժխտումը մի քանի դեբատ է վերապրել Կնեսետում և նույնիսկ կրթության նախկին նախարարի ջանքերը` ավելացնելու թեման դպրոցական ծրագրում:

«Իրայելի դիրքորոշումը չի փոխվել»,- ասել է ԱԳՆ խոսնակ Էմանուել Նահշոնը անցած շաբաթ տեղի ունեցած հարցազրույցում: «Իսրայելն ու հրեա ժողովուրդը ցուցաբերում են զորակցություն և կարեկցանք հայ ժողովրդին և կառավարությանը խոր ողբերգության լույսի ներքո, որին նրանք ենթարկվել են Առաջին համաշխարհային պատերազմի ժամանակ»:

Նահշոնը զգուշորեն շրջանցել է «ց» տառով սկսվող բառը։ Նույն կերպ է վարվել նաև Կնեսետը մամլո հաղորդագրությունում, որը վերաբերում էր Երևանում Իսրայելի պատվիրակությանը՝ Ցեղասպանությանն անդրադառնալով որպես «հայկական ողբերգություն»:

Ցեղասպանության ճանաչումը կմարգինալացնի՞ Հոլոքոսթը: Ոմանք կարծում են, որ Հոլոքոսթի եզակիությունը կանխում է Իսրայելի կողմից 1915-ի դեպքերը «ցեղասպանություն» որակել: Ոմանք վիճարկում են, որ Հոլոքոսթից տառապած հրեաները պարտավոր են լինել առաջինը` ճանաչելու այլ ժողովուրդների հանդեպ տեղի ունեցածը:

Հավանաբար, Թուրքիայի հետ կապերից առավել կարևոր է Իսրայելի ծաղկող բարեկամությունն Ադրբեջանի հետ, հայտնում է հոդվածագիրը: