Ֆրեզնոյի հայերը հիշում են Հայոց ցեղասպանության զոհերին, խոստանում երբեք չմոռանալ

Ուրբաթ երեկոյան Ֆրեզնոյի Սուրբ Պողոս եկեղեցում տեղի հայ հոգևոր առաջնորդների առաջնորդությամբ Հայոց ցեղասպանության 100-րդ տարելիցի հիշատակության միջոցառումներ են իրականացվել: Այս մասին հայտնում է fresnobee.com-ը:

Միջոցառումները մեկնարկել են երթով, Ֆրեզնոյի քաղաքապետարանի վրա հայկական դրոշի բարձրացումով՝ ի հիշատակ Հայոց ցեղասպանության զոհերի:

Երեկոն սկսվել է ժամը 7-ին՝ հոգևոր միջոցառումներով: Ավելի քան մեկ տասնյակ հոգևորական տեղի հայկական 7 եկեղեցուց միավորել է ուժերը միջոցառման համար: Հավաքվածները երգել են «Հայր մերը»:

7:15-ին հավաքվածները մեկ րոպե լռությամբ հարգել են զոհերի հիշատակը, եկեղեցու զանգերը մեկուկես րոպե հնչել են՝ ի նշան Ցեղասպանության մեկուկես մլն զոհերի հիշատակի:

Կրոնական միջոցառումներից հետո հավաքվածները՝ Հայաստանի և Ամերիկայի դրոշները ձեռքներին երգել են երկու երկրի օրհներգերը: