Գործարար միջավայրի ցուցանիշը կայունության միջակայքում է

Գործարար միջավայրի ցուցանիշը (ԳՄՑ) 2015թ. առաջին եռամսյակում կազմել է 54.8 և նախորդ եռամսյակի նկատմամբ աճի միտում է ցուցաբերել: Ինչպես «Արմենպրես»-ին տեղեկացրին Կենտրոնական բանկի հասարակայնության հետ կապերի ծառայությունից, ինդեքսը նախորդ եռամսյակի մակարդակից բարձր է 6.7 կետով, իսկ նախորդ տարվա նույն եռամսյակի համեմատ՝ ցածր 1.1 կետով:

Այս եռամսյակում ԳՄՑ մակարդակի աճը հիմնականում պայմանավորված է շինարարության ոլորտի հաշվեկշռի դիրքի 29.4 կետով կամ 84.9 տոկոս ավելացմամբ: Գործարար միջավայրի ցուցանիշի համապատասխանաբար 3.2 և 2.1 կետով բարելավում է գրանցվել նաև ծառայությունների և առևտրի ոլորտներում, իսկ արդյունաբերության ոլորտում գրանցվել է 1.5 կետով նվազում: Արդյունքում ԳՄՑ-ն շարունակում է գտնվել կայունության միջակայքի վերին հատվածում:

Այստեղ բարենպաստ միջավայր է համարվում 55-ից բարձր պատասխանների արժեքը, իսկ ցուցանիշի փոփոխությունն ընթացիկ և նախորդ եռամսյակների տարբերությունն է: Գործարար միջավայրի արժեքը հաշվարկվել է արդյունաբերությունում՝ թողարկման ընթացիկ և սպասվող ծավալների ու պաշարների վերաբերյալ կազմակերպությունների սպասումների, շինարարությունում՝ ընկերության ներկա տնտեսական վիճակի և աշխատողների ընթացիկ թվաքանակի, առևտրում՝ թողարկման ընթացիկ և սպասվող ծավալների և արտադրանքի նկատմամբ պահանջարկի, ծառայություններում՝ ընկերության ներկա ու սպասվող տնտեսական վիճակի փոփոխությանը վերաբերող հարցերի պատասխանների սեզոնային հարթեցված մակարդակների հիման վրա:

Ցուցանիշի հաշվարկման համար տրվող հարցերը ունեն պատասխանների հետևյալ տարբերակները. աճ, անփոփոխ մակարդակ, նվազում: Պատասխանների հիման վրա հաշվարկվում է յուրաքանչյուր տարբերակի տեսակարար կշիռը պատասխանների ընդհանուր քանակում, այնուհետև դրական պատասխանների տեսակարար կշռին գումարվում է չեզոք պատասխանների կշռի կեսը' ստանալով պատասխանների արժեքները: Արժեքները տատանվում են [0-100] միջակայքում: 0 արժեքը խոսում է այն մասին, որ բոլոր ռեսպոնդենտները նշել են նվազում, 100 արժեքը' աճ, իսկ 50 արժեքը' կայուն վիճակ (աճ և նվազում ակնկալող հարցվողների քանակը հավասար է): Որպես կայունության միջակայք ընդունվել է արժեքի տատանումը 45-55-ը: