Լուկաշենկոն կոչ է արել ԵԱՏՄ-ին՝ համաձայնության գալ իրենց արտադրողների պաշտպանության շուրջը

Եվրասիական տնտեսական միության երկրները պետք է շտապ համաձայնության գան իրենց արտադրողների պաշտպանության միջոցների շուրջը: Այդ մասին, ինչպես տեղեկացնում է «Արմենպրես»-ը, հայտարարել է Բելառուսի նախագահ Ալեքսանդր Լուկաշենկոն ապրիլի 29-ին բելառուս ժողովրդին և Ազգային ժողովին հղած ուղերձում:

Նա բերել է օրինակներ, երբ ներմուծվող արտադրանքը ներկրվում է ի վնաս սեփական արտադրողների: «Անցյալ տարի ներկրել են ՄԱԶ-ի նման 6,2 հազար ավտոմեքենա: Այսօր ՄԱԶ-ը խնդրում է տարեկան 2 հազար ավտոմեքենայի պետպատվեր: Դուք ինչո՞ւ եք դրանք ներկրել»,- հարցրել է Լուկաշենկոն:

«Սառնարանների արտադրության առկայության դեպքում ինչո՞ւ ենք մենք ցածրորակ ապրանք ներկրում արտասահմանից»,- հավելել է նա:

Ըստ ՌԻԱ Նովոստիի՝ Բելառուսի նախագահը նշել է ԵԱՏՄ-ի երկրների տարբեր մոտեցումներն իրենց արտադրողների պաշտպանության հարցում: «Երբ ռուսական ռուբլին սրընթաց անկում ապրեց, մենք Ռուսաստանի դեմ ոչինչ չձեռնարկեցինք, ի՞նչ արեց Ղազախստանը: Նա պարզապես փակեց ռուսական այն արտադրանքի մատակարարումը, որը խանգարում էր իր արտադրողներին, և արգելեց վաճառքները Ղազախստանի տարածքում»,- ասել է նա:

«Իսկ մե՞նք: Դե չի կարելի նման քայլեր անել, որովհետև մեզ էլ կարող են արգելել: Բայց հարկավոր է անհապաղ համաձայնության գալ: Որոշեք»,- եզրափակել է Բելառուսի ղեկավարը: