Չերնոգորիայում մատուցվել է Հայոց ցեղասպանության զոհերի հիշատակի պատարագ

 Հայոց ցեղասպանության 100-րդ տարելիցի միջոցառումների շրջանակներում, Չերնոգորիայի Պրևլակա կղզու Սբ Միքայել հրեշտակապետ պատմական վանքում Չերնոգորիայի և Պրիմորիայի մետրոպոլիտ Ամֆիլոխի ձեռամբ ապրիլի 26-ին մատուցվեց Հայոց ցեղասպանության նահատակների հիշատակի պատարագ: Ռումինիայի Հայոց թեմի առաջնորդ Տաթև եպիսկոպոս Հակոբյանը, որ ժամանել էր Ամենայն Հայոց Վեհափառի տնօրինությամբ, իր հերթին կատարեց սրբոց նահատակաց նվիրված արարողակարգ:

«Արմենպրես»-ի հաղորդմամբ՝ հիշատակի միջոցառումը կազմակերպվել էր Չերնոգորիայի հայ համայնքի նախաձեռնությամբ և Ռումինիայում ՀՀ դեսպանության աջակցությամբ: Համատեղության կարգով Չերնոգորիայում ՀՀ դեսպան Համլետ Գասպարյանի կողքին միջոցառմանը ներկա էին նաև Չերնոգորիայում Ռուսաստանի դեսպան Անդրեյ Ալեքսեևիչ Նեստերենկոն, Չերնոգորիայի հայ, ռուս և ուկրաինական համայնքների ներկայացուցիչներ, հարյուրավոր տեղացիներ:

Պատարագի ավարտին Օսմանյան կայսրությունում Հայոց ցեղասպանության դատապարտման, Հայաստանի և հայ ժողովրդի հանդեպ համերաշխության վերաբերյալ խոսքով հանդես եկավ մետրոպոլիտ Ամֆիլոխը, որը համարվում է Չերնոգորիայի հեղինակավոր անձանցից մեկը: Ցեղասպանության ժամանակ հայ ժողովրդի վիթխարի կորուստների և դրա ծանր հետևանքների մասին խոսեցին Տաթև եպիսկոպոս Հակոբյանը և դեսպան Համլետ Գասպարյանը: Այնուհետև ներկաները ծանոթացան վանքի բակում բացված՝ Հայոց ցեղասպանության թանգարան-ինստիտուտի լուսանկարային թեմատիկ ցուցադրությանը:

Միջոցառումը լուսաբանում էին Չերնոգորիայի և Սերբիայի կենտրոնական հեռուստաալիքները, ինչպես նաև Չերնոգորիայի ռուսալեզու հանդեսները:

Արարողություններից հետո մետրոպոլիտ Ամֆիլոխի, դեսպան Գասպարյանի և Տաթև եպիսկոպոս Հակոբյանի միջև զրույց կայացավ, որին ներկա էին նաև Չերնոգորիայի հայ համայնքի ղեկավարները: Զրույցի ընթացքում մտքեր փոխանակվեցին Հայաստանի և Հայ առաքելական եկեղեցու հետ հոգևոր և մշակութային-կրթական բնագավառում կապեր հաստատելու, ինչպես նաև Չերնոգորիայի հայ համայնքի հոգևոր կարիքներին աջակցելու շուրջ:

Չերնոգորիայի փոքրաթիվ հայ համայնքը ձևավորվել է վերջին տարիներին՝ Գուրգեն Զաքոյանի, Վահե Հանեսյանի, Վահրամ Մարկոսյանի և նրանց շուրջը համախմբված հայրենասեր մի քանի այլ անձանց ջանքերի շնորհիվ: Ջանասեր այդ խմբին հաջողվել է մի քանի տարվա ընթացքում տեղացիների մոտ վաստակել ճանաչում և ապրիլքսանչորսյան հիշատակի արարողությունների շարքում կազմակերպել նաև տնտեսական և մշակութային բնույթի միջոցառումներ: