Պուտինը սյունակում կիսվել է Հայրենական մեծ պատերազմի տարիներին իր ծնողների մասին հիշողություններով

Ռուսաստանի նախագահ Վլադիմիր Պուտինը «Русский пионер» ամսագրի սյունակում կիսվել է Հայրենական մեծ պատերազմի տարիներին իր պատերազմող հոր և մոր մասին հիշողություններով, գրում է Газета.Ru-ն:

«Անկեղծ ասած` հայրս չէր սիրում շոշափել պատերազմի թեման: Երբ մեծահասակները խոսում էին և հիշում ինչ-որ բան, ես պարզապես նրանց կողքին էի լինում: Իմ պատկերացումներն այն մասին, թե ինչ է տեղի ունեցել ընտանիքիս հետ, պարզ է դարձել մեծահասակների զրույցներից»,- գրել է նախագահը:

Նա նշել է, որ իր հայրը ծառայել է Սևաստոպոլում, եղել է նավաստի:

«Նրան բանակ են տարել 1939-ին: Իսկ վերադառնալուց հետո աշխատել է գործարանում, նրանք մայրիկիս հետ ապրել են Պետրոդվորեցում: Նրանք այնտեղ, կարծեմ, տնակ են կառուցել»,- պատմել է Պուտինը` նշելով, որ երբ սկսվել է պատերազմը, հայրն աշխատելիս է եղել ռազմական ձեռնարկությունում, որտեղ ազատում էին զորակոչվելուց: Սակայն հայրը դիմում է գրել, որ ցանկանում է գնալ պատերազմ:

«Հայրս պատմում էր, որ ինքը վիրավորվել է այնտեղ: Վնասվածքը ծանր է եղել։ Իր ամբողջ կյանքն անցկացրել է ոտքի մեջ մնացորդներով: Ոտքը ցավում էր: Փոքր մնացորդներին նախընտրել էին ձեռք չտալ` ոսկորը չմասնատելու համար»,- գրել է Պուտինը:

Նա ասել է, որ իր ծնողները գերմանացի զինվորների հանդեպ ատելություն չէին տածում:

«Ես մինչ օրս, անկեղծ ասած, չեմ կարողանում դա հասկանալ: Մայրս ընդհանրապես շատ մեղմ և բարի մարդ էր: Եվ նա ասում էր` «Ինչ ատելություն կարող է լինել այդ զինվորների հանդեպ: Նրանք հասարակ մարդիկ էին և նույնպես մահանում էին պատերազմում»: Դա զարմանալի է: Մենք մեծանում էինք խորհրդային գրքերով, ֆիլմերով: Եվ ատում էինք։ Իսկ նրա մոտ դա ընդհանրապես այդպես չէր»,- գրել է նախագահը: