ՌԴ-ն ՀԱԷԿ-ի շահագործումը երկարացնելու համար Հայաստանին կտրամադրի 15 տարի մարման ժամկետով վարկ

Հայկական ատոմակայանի 2-րդ էներգաբլոկի շահագործման ժամկետը ևս 10 տարով երկարաձգելու համար Հայաստանը Ռուսաստանից 270 միլիոն դոլարի վարկ կստանա: Ազգային ժողովը քննարկում է 2015 թվականի փետրվարի 5-ին Մոսկվայում ստորագրված «Հայաստանի Հանրապետության կառավարության և Ռուսաստանի Դաշնության կառավարության միջև Հայաստանի Հանրապետության տարածքում ատոմային էլեկտրակայանի շահագործման ժամկետի երկարաձգման աշխատանքների ֆինանսավորման համար Հայաստանի Հանրապետության կառավարությանը պետական արտահանման վարկ տրամադրելու մասին» համաձայնագիրը:

Հիմնական զեկուցողը՝ ՀՀ էներգետիկայի և բնական պաշարների նախարարի տեղակալ Արեգ Գալստյանը հայտնեց, որ, բացի այդ, Հայաստանը համաձայնագրով հնարավորություն է ստանում ՌԴ-ից ստանալ 30 միլիոն դոլարի դրամաշնորհ: «Այս համաձայնագրով մենք հնարավորություն ենք ունենում Ռուսաստանից 270 միլիոն դոլարի վարկ վերցնել, ինչպես նաև 30 միլիոն դոլարի դրամաշնորհ: Վարկի օգտագործման ժամկետը 4 տարի է՝ 2015-2019թթ: Մենք 4 տարվա ընթացքում այդ գումարները պետք է օգտագործենք»,- «Արմենպրես»-ի հաղորդմամբ՝ ընդգծեց Գալստյանը:

Փոխնախարարը հայտնեց, որ մայր գումարի մարումն իրականացվելու է 10 տարվա ընթացքում՝ հավասարաչափ (ըստ կիսամյակների): Վարկի մարման ժամկետը 15 տարի է, որի մեջ մտնում է նաև 5 տարի արտոնյալ ժամկետը: Վարկի տոկոսադրույքը համաձայնագրում ևս հստակ ֆիքսված է՝ տարեկան 3 տոկոս: