Աշխատավորների տոնը` «անաշխատանք» Հայաստանում

Թեպետ այսօր նշվում է աշխատավորների միջազգային օրը, բայց չպետք է մոռանանք, որ Հայաստանում մեծ թիվ է կազմում գործազրկությունը: Տնտեսագետ Վահագն Խաչատրյանը ԼՈՒՐԵՐ.com-ի թղթակցի հետ զրույցում նկատեց, որ Հայաստանում գործազրկությունը գտվում է բարձր մակարդակի վրա, որն էլ մեր երկրի ամենամեծ խնդիրներից մեկն է: «Պաշտոնապես 17% գործազրկություն կա, իրականում ավելի բարձր է, բայց անգամ այդ 17%-ը մեծ թիվ է: Գործազրկության մակարդակը հատկապես երիտասարդության շրջանում հասնում է մինչև 40%-ի: Անընդհատ նոր պրոբլեմներ է ստեղծվում աշխատատեղերի բացակայության պատճառով, շատ դեպքերում մարդիկ լքում են երկիրը, քանի որ չեն կարողանում աշխատանք գտնել»: 

Տնտեսագետին հարցրինք նաև՝ վերջին շրջանում մի քանի եկեղեցի կառուցվեց Հայաստանում, դրա փոխարեն կարելի էր, օրինակ, գործարաններ կառուցել, արդյոք ո՞ւր է գնում մեր աշխարհիկ պետությունը եկեղեցաշինությամբ, պատասխանեց. «Եկեղեցին ևս անհրաժեշտ է, բայց առաջին հերթին աշխատատեղերի մասին պետք է մտածել: Պետք է խթանել փոքր և միջին բիզնեսի զարգացումը, քանի որ այն ծանր վիճակում է գտնվում: Իշխանությունները, բացի հայտարարություններից, փոքրի և միջին բիզնեսի նկատմամբ հոգատար վերաբերմունք չեն ցույց տալիս: Ժամանակակից պայմաններում հիմնական աշխատատեղերի հարցը դա է լուծում, բայց մեր մոտ հակառակն է. գնալով փոքր և միջին բիզնեսի ներկայացուցչների թիվը կրճատվում է, և աշխատատեղերի թիվն էլ պակասում: Դա բերում է խոշորացման, մենաշնորհների»: