Գյումրու քաղաքապետը վստահ է, որ քաղաքը կկարողանա վերականգնել իր արդյունաբերական անունը

Գյումրու քաղաքապետ Սամվել Բալասանյանը վստահ է, որ Գյումրին, թեև ոչ նախկին ծավալներով, բայց կկարողանա վերականգնել իր արդյունաբերական անունը: «Չեմ ասում, թե կկարողանանք վերականգնել նախկին ծավալները՝ Լենինականը ժամանակին եղել է նախկին ԽՍՀՄ-ում ծավալներով տեքստիլ արդյունաբերություն ունեցող երկրորդ քաղաքը, բայց արդեն իսկ հիմա քաղաքում կա պոտենցիալ՝ հիմա աշխատատեղեր են ստեղծվում թեթև արդյունաբերության մեջ: Կամաց-կամաց ամեն ինչ կվերականգնվի, պարզապես պետք է համբերություն և համախմբվածություն: Թեև քննադատում են, բայց քաղաքում ամեն օր նոր փոփոխություն կա»,-«Արմենպրես»-ին վստահեցրեց Սամվել Բալասանյանը:

Նշենք, որ մինչ 1988 թվականի երկրաշարժը Հայաստանի արդյունաբերական ձեռնարկությունների ավելի քան 40%-ը գտնվում էր Լենինականում: Լենինականը Հայաստանի արդյունաբերական կենտրոններից էր, որն ուներ ավելի քան 50 ձեռնարկություն, որտեղ աշխատում էին 40 000 բանվոր-ծառայող։ Թողարկվում էր ավելի քան 700 տեսակ արդյունաբերական ապրանք 370 մլն ռուբլու ընդհանուր արժեքով (1977)։ Տնտեսության առաջատար ճյուղը թեթև արդյունաբերությունն էր՝ հատկապես բամբակե գործվածքեղենի արտադրությունը (տալիս էր քաղաքի արդյունաբերության համախառն արտադրանքի 54«8%-ը)։ Գյումր ին ՍՍՀՄ տեքստիլ արդյունաբերության կարևոր կենտրոններից էր և ամենախոշորը Հայկական ՍՍՀ-ում։ Հանրապետությունում առաջինը Գյումրիում հիմք դրվեց տրիկոտաժեղենի արդյունաբերությանը։ Երբեմնի հզոր արդյունաբերական քաղաքում, 1988 թվականի երկրաշարժի հետրանքով, այսօր ընդամենը մի քանի ձեռնարկություն է աշխատում՝ այն ոչ լրիվ ուժով: