Կկարողանա՞ ԱՄՆ-ն դադարեցնել «Թուրքական հոսքի» կառուցումը. Forbes

Համաշխարհային Մամուլ 7 Մայիս, 2015 15:23

«Թուրքական հոսք» գազատարով ռուսական գազը կհասնի սպառողներին միայն Ռուսաստանի և Արևմուտքի միջև նոր «սառը պատերազմի» ավարտից հետո, Forbes-ի ռուսական տարբերակում գրում է East European Gas Analysis-ի գլխավոր տնօրեն Միխայիլ Կորչեմկինը:

Ռուսական «Գազպրոմ» ընկերության ղեկավար Ալեքսեյ Միլլերն ու ՌԴ էներգետիկայի նախարար Ալեքսանդր Նովակը վերջերս Գերմանիայում հայտարարեցին, որ Ռուսաստանը 2019 թվականից հետո չի երկարաձգելու գազի տարանցման մասին համաձայնագիրն Ուկրաինայի հետ, և Բալկաններն ու Հարավային Եվրոպան ստիպված են լինելու ռուսական գազը գնել թուրք-հունական սահմանից:

«Ժամկետը խիստ սահմանափակ է, այդ հզորությունը պետք է ի հայտ գա արդեն 2019 թվականին: Իսկ դրան հասնելու համար շինարարությունը պետք է սկսել հենց այսօր:

Իմ կարծիքով՝ ոչ ոք ոչինչ չպետք է կառուցի, քանի որ «Թուրքական հոսք» չի լինելու: Եվ խնդիրն ամենևին էլ գազի գնի զեղչի շուրջ ռուս-թուրքական բանակցությունների փակուղում լինելու մասին տեղեկությունները չեն: Այդ նախագծի իրականացման համար «Գազպրոմը» շատ խոչընդոտներ պետք է հաղթահարի: Նախ՝ պետք է գումար գտնել: Երկրորդ՝ Ռուսաստանը պետք է զգույշ արտաքին քաղաքականություն վարի՝ ԱՄՆ-ին, Եվրամիությանն ու Շվեյցարիային առիթ չտալով արգելել «Գազպրոմին» ստորջրյա շինարարական ծառայությունների մատուցումը (բոլոր ընկերությունները, որոնք կարող են կառուցել «Թուրքական հոսքը», «պատժամիջոցային երկրների» սուբյեկտներ են):

Ենթադրենք՝ Ռուսաստանն ու «Գազպրոմը» կարողացան շրջանցել բոլոր արգելքներն ու խողովակաշարը կառուցվեց: Սակայն դա ամենևին էլ չի նշանակում, որ գազը կհասնի վերջնական սպառողներին:

Հունաստան հասած 47 մլրդ խորանարդ մետր գազի մեծ մասը նախատեսված է Իտալիայի սպառողների համար: «Գազպրոմի» համոզմամբ՝ Թուրքիայից Իտալիա խողովակաշարը պետք է կառուցեն գնորդները, իսկ եթե չկառուցեն, ռուսական մոնոպոլիստը կփակի ծորակն ու դադար կվերցնի:

Սակայն հենց «Գազպրոմը» դադարեցնի Իտալիային գազի մատակարարումը, ԱՄՆ-ն կարող է ռուսական կողմի ֆինանսավորումն ամերիկյան բանկերի միջոցով դադարեցնել:

Ամերիկյան բանկերին, հավանաբար, կհետևեն նաև այլ ֆինանսական կազմակերպություններ՝ չցանկանալով վեճի մեջ մտնել ԱՄՆ-ի հետ, սակայն առանց արտաքին ֆինանսավորման՝ Արևելյան գազային նախագիծը կդադարի»,- գրում է հոդվածագիրը: