Հաղթանակի 70-ամյակին նվիրված զորահանդեսը Մոսկվայում կլինի ամենամասշտաբայինը. ՈՒՂԻՂ

Հայրենական Մեծ պատերազմի հաղթանակի 70-ամյակին նվիրված տոնական զորահանդեսը Մոսկվայի Կարմիր հրապարակում կլինի Ռուսաստանի ժամանակակից պատմության մեջ ամենազանգվածայինը: Ռուսաստանի պաշտպանության նախարար Սերգեյ Շոյգուն հայտնել է, որ այս տարվա զորահանդեսը կլինի տեխնիկապես ամենահագեցածը:

Տոնական արարողությունները կմեկնարկեն Հաղթանակի շքերթներից, որոնք կանցկացվեն Ռուսաստանի 28 քաղաքում: Դրանցում ներգրավված կլինի ավելի քան 78 հազար 500 մարդ, շուրջ 2 հազար միավոր ռազմական տեխնիկա, 238 թռչող սարքեր և 51 ռազմական նավեր:

Այս տարվա տոնակատարության ժամանակ Մոսկվայի գլխավոր հրապարակով կանցնեն ավելի քան 16 հազար 500 զինծառայողներ, այդ թվում՝ տասը տոնական մարտական հաշվարկ Հայաստանից, Բելառուսից, Ղազախստանից, Ղրղզստանից, Մոնղոլիայից, Թուրքմենստանից, Հնդկաստանից, Սերբիայից, Չինաստանից և Ադրբեջանից:

Տոնական զորահանդեսն ամենամասշտաբայինը կլինի նաև ներգրավված տեխնիկայի թվով՝ շուրջ 200 զինտեխնիկա, ինչպես նաև 143 ինքնաթիռ և ուղղաթիռ:

Շքերթը բաղկացած կլինի 4 մասից. պատմական մարտական հաշվարկների երթ, հետիոտն զորասյուններ, մեխանիզացված շքերթային հաշվարկներ և ավիացիոն ուժերի շքերթային թռիչք:

Զորահանդեսին ՌԴ նախագահ Վլադիմիր Պուտինի հրավերով կմասնակցի Հայրենական պատերազմի 85 վետերան Ռուսաստանի տարածքից, ինչպես նաև պատերազմի 78 մասնակից՝ հակաֆաշիստական կոլիացիայից և ԱՊՀ երկրներից:

Հաղթանակի 70-ամյակին նվիրված միջոցառմանը մասնակցելու նպատակով Մոսկվայում կլինի 27 պետության ղեկավար, այդ թվում՝ ՀՀ Նախագահ Սերժ Սարգսյանը: ՄԱԿ-ի գլխավոր քարտուղար Պան Կի Մունը ևս հաստատել է իր մասնակցությունը արարողություններին: