ԱՄՆ-ը Հունաստանին համոզում է չմասնակցել «Թուրքական հոսք» նախագծին. The New York Times

ԱՄՆ-ը Հունաստանին համոզում է չմասնակցել «Թուրքական հոսք» նախագծին, գրում է The New York Times թերթը:

Նախօրեին թերթին տված հարցազրույցում ԱՄՆ Պետդեպում Էներգետիկ ռեսուրսների բյուրոյի ղեկավար Ամոս Հոքսթայնն Աթենքին առաջարկել է ավելի ակտիվորեն մասնակցել հարավային գազային միջանցքի նախագծին, որը ներառում է Անդրադրիատիկ գազատարի շինարարությունը, որով գազափոխադրումներ կարվեն Ադրբեջանից Եվրոպա: Հոքսթայնը հայտարարել է, որ այդպիսով Հունաստանը կարող էր մեծացնել իր գրավչությունն արևմտյան ներդրողների շրջանում և նվազեցնել ռուսական գազի փոխադրումներից ԵՄ-ի կախվածությունը:

«Դա հրաշալի նախագիծ է Հունաստանի համար, քանի որ զգալի թվով աշխատատեղեր կստեղծի»,- հայտարարել է ամերիկացի պաշտոնյան:

Ավելի վաղ Հունաստանի կառավարությունը հայտնել էր, որ պետական նախարար Նիկոս Պապպասը ուրբաթ օրը հանդիպել է ԱՄՆ Պետդեպի միջազգային էներգետիկ հարցերով հատուկ ներկայացուցիչ Ամոս Հոքսթայնի հետ:

2014թ. դեկտեմբերի 1-ին «Գազպրոմը» և թուրքական Botas ընկերությունը Ռուսաստանից Թուրքիա Սև ծովով գազատարի շինարարության վերաբերյալ փոխըմբռնման հուշագիր են ստորագրել: Դրա հզորությունը կկազմի 63 մլրդ խմ, որից մինչև 47 մլրդ խմ-ը կփոխադրվի թուրք-հունական սահմանին գտնվող նոր գազային հանգույց: Հունաստանն արդեն հետաքրություն է հայտնել Եվրոպայի ուղղությամբ իր տարածքով գազատարի շինարարության շարունակության հարցում:

Անդրադրիատիկ գազատարը ստեղծվում է Մերձկասպյան տարածաշրջանից և Մերձավոր Արևելքից Արևմտյան Եվրոպա բնական գազի փոխադրման համար: Խողովակաշարի երկարությունը, որը կանցնի Հունաստանով, Ալբանիայով, Ադրիատիկ ծովով, Իտալիայով, 871 կմ է, առավելագույն թողունակությունը` 10 մլրդ խմ տարեկան: