Երվանդ Զախարյանն ակնկալում է մինչև տարեվերջ լուծել «Նաիրիտ»-ի աշխատակիցների աշխատավարձերի հարցը

Հայաստանի կառավարությունը էներգետիկաի բնագավառի այլ ընկերությունների ֆինանսական միջոցների հաշվին փորձում է մեղմել «Նաիրիտ» գործարանի շուրջ ստեղծված իրավիճակը և լուծում տալ գործարանի աշխատակիցների աշխատավարձերի խնդրին:

Այս մասին մայիսի 13-ին լրագրողների հետ հանդիպմանն ասաց ՀՀ Էներգետիկայի և բնական պաշարների նախարար Երվանդ Զախարյանը: «Մենք մեր հնարավորությունների սահմաններում յուրաքանչյուր երկու-երեք ամիսը մեկ անգամ վճարում ենք աշխատավարձերը: Վերջերս էլ նորից մեկ ամսվա աշխատավարձը վճարվեց»,- «Արմենպրես»-ի փոխանցմամբ՝ նշեց նախարարը:

Նախարարը ներկայացրեց այն աշխատանքները, որոնք իրականացվում են առկա խնդիրներին լուծում տալու համար: «Դուք գիտեք, որ «Նաիրիտ»-ի ընդհանուր գույքը և բաժնետոմսերը գրավադրված են: Հանրապետության Նախագահի, կառավարության կողմից աշխատանքներ տարվել են, որպեսզի հնարավորինս շուտ կարողանանք գույքն ազատել գրավից: Այդ հարցը կարծես լուծվում է: Իմ կարծիքով՝ մոտակա մի քանի օրվա ընթացքում մենք կկարողանանք գույքը հանել գրավից, որից հետո այն կհանձնվի Հայաստանի կառավարությանը»,- ասաց նախարարը:

Զախարյանը դժվարացավ հստակ նշել, թե որքան ժամանակ հետո հնարավոր կլինի ամբողջությամբ մարել «Նաիրիտ»-ի աշխատակիցների աշխատավարձերի պարտքը, որը կազմում է 5.7 միլիարդ դրամ: «Ես հույս ունեմ, որ մինչև տարվա վերջ մենք կկարողանանք հնարավորություններ ստեղծել աշխատավարձի խնդիրը լուծելու համար»,- ասաց նախարարը: